Steinn Jóhannsson skipaður rektor Menntaskólans við Hamrahlið

Lilja Alfreðsdóttir, mennta-og menningarmálaráðherra, hefur skipað Stein Jóhannsson í stöðu rektors Menntaskólans við Hamrahlíð. Þrjár umsóknir bárust um embættið.

Steinn er skipaður rektor skólans til fimm ára. Hann hefur víðtæka kennslu-og stjórnunarreynslu á framhalds-og háskólastigi og gegndi meðal annars embætti skólameistara Fjölbrautaskólans við Ármúla á árunum 2012-2017.

Frá 2017 hefur hann starfað sem konrektor Menntaskólans við Hamrahlíð og sem settur rektor skólans frá febrúarmánuði til apríl á þessu ári. Steinn var forstöðumaður kennslusviðs Háskólans í Reykjavík á árunum 2002-2012.

Steinn lauk BA-prófi í stjórnmálafræði og sögu frá Louisiana-háskóla í Monroe og  MA-prófi í sagnfræði. Þá lauk hann námi í uppeldis-og kennslufræði frá Háskóla Íslands og er með kennsluréttindi á grunn-og framhaldsskólastigi.