Lítið sem ekkert í þrotabúi Primera

Tæplega 4,6 milljónir króna og ein bifreið hafa fundist upp í tæplega 17 milljarða króna kröfur í þrotabú flugfélagsins Primera air. Þetta segir skiptastjórinn Morten Hans Jakobsen í samtali við danska blaðið Jydske Vestkysten og kveðst undrandi á niðurstöðunni.

Sami fjölmiðill hefur áður greint frá því að um fimm hundruð kröfuhafar hafi lýst 16,7 milljarða króna kröfum í þrotabúið. Stærstu kröfuhafarnir eru flugvélaleigan Aviation Capital Group, með 519 milljóna króna kröfu, skatta- og tollayfirvöld í Bretlandi, með kröfu upp á 250 milljónir króna og Evrópska flugumferðarstjórnin, eða Eurocontrol Brussels, með kröfu sem hljóðar upp á 240 milljónir króna. 

Bíllinn sem fannst í búinu hefur verið seldur fyrir 150 þúsund danskar krónur, eða um 2,7 milljónir króna og alls eru því 7,3 milljónir króna til skiptanna eins og er.

Jakobsen segist hafa fengið upplýsingar um að 5,1 milljón danskar krónur, eða um 93 milljónir króna, væru í búinu, auk búnaðar að andvirði 27 milljóna króna, eða samanlagt um 120 milljónir íslenskra króna. Hann segir athugun á málinu standa yfir og er meðal annars skoðað hvort einhverjum fjármunum hafi verið komið undan skiptum.

Unnið sé að endurheimt fjármuna eftir öllum leiðum og er nú verið að kanna hvort einhverjir skuldi félaginu pening. Hann segir útlitið virðast nokkuð svart fyrir kröfuhafa.