Lokaþáttur The Grind: Sjáðu Gunnar klára niðurskurðinn

Lokaþátturinn af The Grind með Gunnari Nelson er kominn en þar er sýnt hvernig Gunnar fer að því að losa sig við lokakílóin áður en hann stígur á vigtina.

Það er alltaf sama ferlið hjá Gunnari á vigtunardegi. Hann fer í heitt bað og lætur svo pakka sér inn í handklæði og sæng á eftir. Þar liggur hann svo í klukkutíma og kílóin hrynja af.

Vigtunin fór fram á sama hóteli og Gunnar býr á. Þegar hann var kominn í rétta þyngd tók hann lyftuna bara niður og nánast stökk beint á vigtina.

Gunnar hefur verið á sérstöku fæði alla vikuna og það hélt áfram eftir vigtunina. Bæði sérstakir drykkir og matur til þess að ná aftur upp orku.

Gunnar Nelson berst við Bretann Leon Edwards í London í kvöld. Bardaginn er í beinni á Stöð 2 Sport. Vísir er í London og mun fylgjast ítarlega með öllu í aðdraganda bardagans sem og bardaganum sjálfum.