Hægt að bóka flug með WOW til og frá London

Hægt er að bóka flug með WOW air til og frá London á morgun og á miðvikudag samkvæmt bókunarsíðu félagsins.

Þegar blaðamaður reyndi það sama í hádeginu í dag var það ekki hægt og fékk hann upp meldinguna „ekkert flug.“

Svanhvít Friðriksdóttir, upplýsingafulltrúi WOW air, segir að líklega hafi ástæðan verið tæknilegt atriði.

Samkvæmt upplýsingum frá WOW air hafa ekkert flug hafi verið fellt niður frá og með morgundeginum en nokkrar flugferðir eru fullbókaðar þessa vikuna.

Skúli Mogensen, forstjóri félagsins, rær nú lífróður til þess að bjarga félaginu eftir að viðræðum við Icelandair um mögulega aðkomu að rekstri WOW air var slitið í gær.

Flugi WOW air til og frá Gatwick var aflýst í morgun en ekki hafa fengist upplýsingar um það hvers vegna það var gert. Þá hafa fjölmiðlar greint frá því að tvær vélar félagsins hafi verið kyrrsettar erlendis að beiðni eigenda þeirra.