Zidane hrósar Hazard í hástert og ýtir undir komu hans

Zinedine Zidane, stjóri Real Madrid, hefur viðurkennt að hann hafi alltaf haft miklar mætur á leikmanni Chelsea, Eden Hazard, en Belginn hefur verið mikið orðaður við Real Madrid.

Zidane og Real Madrid mæta Eibar á morgun en öll athyglin beinist að sumarglugganum hjá Real Madrid þar sem er búist við að mikið gangi á. Stokka þarf upp spilin hjá Real Madrid.

„Ég mun ekki segja mína skoðun um hvað muni gerast því tímabilið er ekki á enda en mér hefur alltaf líkað vel við hann. Ég hef séð mikið frá honum frá því hann spilaði á Frakklandi og hann er frábær,“ sagði Zidane.

Mikið hefur verið rætt og ritað um að leikmenn Real hafi litlan sem engan áhuga að spila þá leiki sem eftir eru á leiktíðinni en Zidane sér annað á æfingum.

„Ég er ekki inni í huganum hjá leikmönnunum. Það sem ég sé á æfingum er að þeir eru með stolt til þess að klára tímabilð vel. Valencia gerði vel í síðasta leik en við gerðum einnig vel í þeim leik.“