Icelandair tapaði 6,7 milljörðum á fyrsta árs­fjórðungi

Flugfélagið Icelandair tapaði 6,7 milljörðum króna á fyrsta ársfjórðungi þessa árs. Þetta kemur fram í uppgjöri félagsins fyrir fjórðunginn sem kynnt var í dag.

Í tilkynningu frá félaginu segir að heildartekjur þess á fjórðungnum hafi verið 30,2 milljarðar króna. Það er sjö prósent lækkun frá árinu 2018. Þá var afkoman fyrir fjármagnsliði, afskriftir og skatta (EBITDA) neikvæð um 1,8 milljarða króna en það er þó 19 prósent betri afkoma en í fyrra.

Eiginfjárhlutfall félagsins í lok mars var 23 prósent samanborið við 32 prósent í árslok 2018. Þá fjölgaði farþegum til Íslands um 13 prósent.

Haft er eftir Boga Nils Bogasyni, forstjóra Icelandair, að rekstur félagsins hafi hins vegar verið krefjandi eins og búist hafði verið við. Rekstrarniðurstaðan sé í takt við áætlanir.

„Þróun fargjalda var neikvæð milli ára, sem skýrist meðal annars af mikilli samkeppni við flugrekendur sem boðið hafa upp á ósjálfbær fargjöld. Jafnframt var áframhaldandi þrýstingur á fargjöld milli Evrópu og N-Ameríku. Innleiðingar- og þjálfunarkostnaður vegna sex nýrra flugvéla sem félagið hafði gert ráð fyrir að taka í notkun hafði neikvæð áhrif auk þess sem einskiptiskostnaður féll til vegna kyrrsetningar B737 MAX flugvéla,“ er haft eftir Boga í tilkynningunni en nánar má lesa um uppgjörið hér.