Nítján sagt upp í heilbrigðis- og félagsþjónustu í maí

Tvær tilkynningar bárust Vinnumálastofnun í maí um hópuppsagnir þar sem 53 starfsmönnum samanlagt var sagt upp störfum á tveimur stöðum. Áður hefur verið greint frá uppsögn 34 starfsmanna hjá Isavia en í tilkynningu frá Vinnumálastofnun kemur fram að nítján hafi verið sagt upp í heilbrigðis- og félagsþjónustu.

Fréttastofa sendi Vinnumálastofnun fyrirspurn varðandi það hvaða aðili sagði upp 19 manns í heilbrigðis- og félagsþjónustu í maí. Þau svör fengust að þær upplýsingar væru almennt ekki veittar. Vísir hefur á grundvelli upplýsingalaga óskað eftir svörum um það hvaða fyrirtæki um ræðir. Er málið á borði forstjóra og lögfræðings Vinnumálastofnunar.

Auk fyrrnefndra hópuppsagna var fjöldi annarra uppsagna í maí. Þannig misstu 24 flugmenn hjá Icelandair vinnuna, tólf starfsmenn Heklu, níu starfsmenn hjá Arion banka og sextán hjá Íslandsbanka.