Gunnar: Ég er að tapa og það sökkar

Gunnar Nelson var að vonum niðurlútur er Vísir hitti á hann skömmu eftir tapið gegn Gilbert Burns í Kaupmannahöfn.

„Mér fannst þetta vera helvíti jafnt og hornið mitt var á því að ég hefði unnið. Ég held að þessi fella hans í síðustu lotunni hafi unnið bardagann fyrir hann,“ sagði okkar maður súr eftir þetta svekkjandi tap í afar jöfnum bardaga.

„Ég hefði átt að gera meira og verð að fara yfir þetta. Það er auðvitað alltaf hægt að segja þetta en hann gerði sitt mjög vel. Það hefði verið geðveikt að ná fellu í endann en ég veit ekki alveg hvað ég á að segja. Grautfúlt og ég hefði viljað gera meira úr þeim færum sem ég fékk.“

Gunnar var að glíma við fyrrum heimsmeistara í brasilísku jiu jitsu og bardaginn var lengi vel eins og skák á milli þeirra.

„Hann var mjög sterkur. Þykkur og líka helvíti sleipur eins og sumir eru. Erfitt að ná taki á honum og svo er hann ógeðslega góður í jörðinni,“ sagði Gunnar og bætti við að Burns hefði aldrei verið nálægt því að ná uppgjafartaki er hann náði utan um okkar mann.

Gunnar fékk mjög þungt hnéspark í andlitið í bardaganum en það hafði engin áhrif á hann.

„Ég fann alveg fyrir því en ekkert hroðalegt. Ég fann meira fyrir vinstri krók sem hann kom með. Sá lenti betur. Það var ekkert sem vankaði mig í bardaganum,“ sagði Gunnar en hvar gat hann gert betur?

„Margt. Ég hefði þurfti að vera agressívari standandi. Enn og aftur fannst mér ég vera að bíða eftir opnunum. Hefði mátt nota stunguna meira sem var að lenda vel. Ég hef verið að vinna meira í þessum málum með Jorge Blanco. Mér finnst mikið vera að smella saman og finnst ég þurfa meiri tíma með honum.“

Þetta er í fyrsta sinn á ferlinum sem Gunnar lendir í því að tapa tveimur bardögum í röð. Það leyndi sér ekki að Gunnari finnst það mjög sárt.

„Þetta er ekkert sérstakt. Það óskar enginn eftir því að vera í þessari stöðu. Ég hef fengið góða andstæðinga og þetta hafa verið naumir bardagar en sama. Ég er að tapa og það sökkar. Það er engin uppgjöf og bara áfram gakk en það þarf eitthvað að stokka til.“