Svona gæti nýr vegur um Dynjandisheiði litið út

Vegagerðin hefur lagt fram frummatsskýrslu um mat á umhverfisáhrifum Vestfjarðavegar um Dynjandisheiði og Bíldudalsvegar frá Bíldudalsflugvelli að Vestfjarðavegi á Dynjandisheiði. Skýrsluna, sem er 432 blaðsíður að lengd, má sjá á vef Skipulagsstofnunar en frestur til að gera skriflegar athugasemdir er til 17. febrúar árið 2020.

Vegagerð við fossinn Dynjanda og um friðlandið í Vatnsfirði eru taldir viðkvæmustu þættir verksins. Samgönguáætlun, sem birt var á Alþingi fyrir jól, sýnir þessa vegagerð fullfjármagnaða, með upphaf framkvæmda á þessu ári, 550 milljónir króna árið 2020.

Í skýrslunni eru sýndar allt að sex mismunandi leiðir á helstu vegköflum. Einn valkostanna er að grafin verði 2,7 km löng jarðgöng efst á Dynjandisheiði, frá Norðdalsdá að Neðri-Vatnahvilft. Þá eru sýndir valkostir um þverun Vatnsfjarðar á móts við Flókalund. Þrívíddarmyndir af mismunandi útfærslum má sjá í 133 blaðsíðna fylgiskjali.

Ekki hefur verið tekin ákvörðun um endanlegt leiðarval en Vegagerðin segir það ráðast af niðurstöðum frummatsskýrslu, framkomnum umsögnum og athugasemdum við frummatsskýrsluna og samráði við leyfisveitendur.

Kaflinn milli Mjólkárvirkjunar í Arnarfirði og Vatnsfjarðar, 40 kílómetrar, á að klárast árið 2024, með alls 5,8 milljarða króna fjárveitingu. Kaflinn af Dynjandisheiði að Bíldudalsflugvelli, 29 kílómetra langur, er tímasettur í langtímaáætlun á árabilinu 2025 til 2029 með alls 4,8 milljarða króna fjárveitingu á þessu tímabili.

Í skýrslunni er rakið að núverandi vegi um Dynjandisheiði, sem fer hæst í 503 metra hæð yfir sjó, sé ekki haldið opnum yfir háveturinn. Sama gildi um Bíldudalsveg. Eru þeir sagðir „hættulegir malarvegir, með einbreiðum brúm, kröppum beygjum og bröttum brekkum“.

„Samgöngur milli sunnanverðra Vestfjarða og Ísafjarðar eru því mjög slæmar, sérstaklega á veturna. Lélegar samgöngur hafa þau áhrif að íbúar á sunnanverðum Vestfjörðum sækja litla þjónustu til Ísafjarðar en gríðarmikla þjónustu til Reykjavíkur. 

Vegurinn er eini stofnvegur landsins sem tengir saman þéttbýlisstaði og er ekki opnaður reglulega að vetrarlagi (milli Vatnsfjarðar og Þingeyrar). Bíldudalsvegi á kaflanum frá Fossi í Fossfirði að Vestfjarðavegi í Helluskarði er ekki haldið opnum að vetrarlagi,“ segir í matsskýrslu Vegagerðarinnar.

„Markmið framkvæmdarinnar er að bæta samgöngur á milli norðan- og sunnanverðra Vestfjarða með heilsársvegi um Dynjandisheiði. Heilsárs hringleið um Vestfirði mun hafa veruleg jákvæð áhrif á samfélagið á Vestfjörðum,“ segir í niðurstöðum.

Stöð 2 fjallaði um verkefnið þann 1. desember síðastliðinn í frétt sem sjá má hér: