Anníe Mist ræðir meðgönguna og framhaldið: Missti lystina á morgunmatnum

Anníe Mist Þórisdóttur stendur í dag á miklum tímamótum á sínum CrossFit ferli en hún er barnshafandi og þarf að gefa frá sér sætið sitt á heimsleikunum í haust. Anníe ræddi meðgönguna og framhaldið í hlaðvarpsþættinum „Make PODS Great Again“ og gaf þar mikla innsýn í líf sitt sem barnshafandi íþróttakonu.

Anníe Mist Þórisdóttur er lifandi goðsögn innan CrossFits heimsins ekki aðeins hér á Íslandi heldur úti líka. Hún er líka vinsæll viðmælandi hjá áhugafólki um íþróttina enda alltaf svo jákvæð og skemmtileg en um leið tilbúin að gefa mikið af sér.

Þessi nýi hlaðvarpsþáttur er enginn undantekning og þar talar okkar kona meðal annars um metnað sinn fyrir því að verða fyrirmynd fyrir íþróttakonur hvað það varða að koma til baka eftir barnsburð. Anníe er nefnilega hvergi nærri hætt og ætlar því að æfa alla meðgönguna til að undirbúa sig undir það að koma til baka.

Lífið hennar og æfingarnar hafa hins vegar mikið breyst eftir að hún komst að því að hún væri ólétt. Hún þurfti fyrst að fela óléttuna á æfingunum sem var ekki auðvelt en tókst samt ótrúlega vel að hennar mati.

Anníe Mist þekkir líkmann sinn mjög vel eftir að hafa þjálfað sig upp í að verða ein  besta CrossFit kona allra tíma.

„Miðað við það sem ég hef lesið og heyrt þá veit ég ekki betur en það gangi allt mjög vel hjá mér. Ég var ekki með morgunógleði og enga bakverki eða eitthvað slíkt. Það eru samt breytingar. Ég hef alltaf verið spennt að vakna og borða morgunmatinn því ég elska morgunmat. Það hefur hins vegar breyst núna og ég gat ekki lengur borðað hafragrautinn minn á morgnanna sem var uppáhaldið mitt. Ég missti líka lystina á grænmeti og kjöti,“ sagði Anníe Mist og segist hafa þurft að gera ráðstafanir til að fá nægt prótein því það hafi verið erfitt fyrstu vikurnar.

„Ég bjóst ekki við breytingunum svona snemma og hélt ég gæti haldið áfram að æfa á fullu en nú þurfa æfingarnar mínar auðvitað aðeins að breytast. Matarlystin breyttist og ég fann fyrir þreytu en gat samt ekki sagt neinum frá því að ég væri ófrísk því ég var komin svo stutt á leið. Þessar fyrstu vikur voru því erfiðastar,“ sagði Anníe Mist Þórisdóttir.

„Ég sagði þjálfaranum mínum strax frá þessu því hann eyðir miklu tíma í að skipuleggja æfingarnar fyrir mig. Ég vildi passa upp á það að ég væri að gera þetta á réttan hátt,“ sagði Anníe Mist sem fór að fylgjast betur með æfingunum sínum.

Gekk nokkuð vel að halda þessu leyndu



„Ég nota púlsmælinn til að passa upp á það að ég sé ekki að fara of hratt og passa upp á að allt sé öruggt. Allt í einu var ég farin að segja við stelpurnar sem ég æfi með heima að nú þyrftu þær að vinna mig í þessari æfingu. Ég ætla að æfa með þennan púls en ég gat ekki sagt þeim af hverju. Ég er bara að prófa hjartað og halda ákafanum niðri. Um leið hugsa ég að þær hljóta að vera átta sig á því að eitthvað sé í gangi,“ sagði Anníe Mist.

„Ég held samt að fólkið í kringum mig og þau sem voru að æfa með mér hafi samt ekki farið að gruna neitt fyrr en viku áður en ég gerði þetta opinbert. Ég held að mér hafi gengið nokkuð vel að halda þessu leyndu því það sást ekki á mér og ég hélt áfram að nota íþróttatopp,“ sagði Anníe Mist.

Hún hélt áfram að vera í toppnum til að reyna að plata fólkið í kringum sig sem hefði aldrei trúað því að ófrísk kona mætti í íþróttatoppi í æfingasalinn. „Þau hefðu haldið að ég reyndi að fela þetta betur en ég ætlaði að láta þetta líta út fyrir að ég væri ekki að fela neitt,“ sagði Anníe Mist hlæjandi.

Anníe Mist heldur áfram að æfa á meðgöngunni og segir að henni líði vel.

„Ég læri mikið á hlaupunum en ég er sem betur fer með mikið af góðu fólki í kringum mig. Ég hef líka lesið mikið og þjálfarinn minn hefur gert það líka. Það eru líka margir á Íslandi sem eru tilbúin að hjálpa mér. Eina vandamálið er bara að það hafa ekki verið gerðar margar rannsóknir um þetta,“ sagði Anníe Mist en það er kannski ástæða fyrir því.

„Ég skil það líka vel því ég væri ekki tilbúin að taka neina áhættu með að athuga hvort einhverjar æfingar séu öruggar eða ekki. Þetta er ekki eitthvað sem þú ert mikið að prófa á þér,“ sagði Anníe Mist. Hún ræddi það hvernig hún nálgast æfingarnar núna.

Núna er það númer eitt, tvö og þrjú að barnið mitt verði heilbrigt



„Ég hef alltaf farið í æfingasalinn til að verða betri. Ég er kannski ekki að reyna að bæta persónulegu metin mín í hvert skipti en ég passa upp að fá sem mest út úr hverri æfingu. Ég ætlaði aldrei að eiga eitthvað inni eftir æfingu en núna mæti ég í æfingasalinn og er ekki að undirbúa mig fyrir það að keppa á heimsleikunum í ár,“ sagði Anníe Mist og hélt áfram.

„Nú mæti ég ekki lengur í æfingasalinn til að verða betri því ég er ekki lengur í forgangi. Íþróttamaður þarf að hugsa mikið um sjálfan sig en núna er það númer eitt, tvö og þrjú að barnið mitt verði heilbrigt þegar það fæðist. Ég þarf síðan líka að hugsa um það að líkaminn minn verði í sem bestu standi eftir að barnið fæðist svo ég geti haldið áfram að æfa og vinna að því að ná markmiðum mínum,“ sagði Anníe Mist

„Ég vil koma aftur og ég vil halda áfram að keppa. Hver veit hvað mun gerast en það eru magnaðar fyrirmyndir þarna úti. Þær hafa sýnt að þetta er hægt og nú síðasta hefur Kara Webb sýnt okkur það með því að koma til baka eftir barnsburð. Það er innblástur fyrir mig og vonandi get ég orðið innblástur fyrir aðrar konur líka. Þetta mun ekki breyta því hver ég er því ég er ennþá keppniskona,“ sagði Anníe Mist.

„Það sem skiptir máli fyrir mig er að barnið færðist heilbrigt og að ég komi í góðu ásigkomulagi til baka og þess vegna þarf ég að minnka æfingarnar mínar,“ sagði Anníe Mist en það má horfa á allan hlaðvarpsþáttinn hér fyrir neðan.