Sjáðu bakfallsspyrnu Zlatans sem tryggði Milan enn einn sigurinn

Zlatan Ibrahimovic sýnir engin merki þess inni á vellinum að hann verði fertugur á næsta ári og sé nýbúinn að jafna sig eftir að hafa fengið kórónuveiruna. Svíinn skoraði sigurmark AC Milan gegn Udinese í gær, 1-2, og er markahæstur í ítölsku úrvalsdeildinni.

Milan hefur farið liða best af stað í ítölsku úrvalsdeildinni og er með tveggja stiga forskot á toppi hennar.

Franck Kessie kom Milan yfir gegn Udinese í gær með skoti í slá og inn eftir sendingu Zlatans á 18. mínútu. Milan var 0-1 yfir í hálfleik en Rodrigo de Paul jafnaði fyrir Udinese úr vítaspyrnu á 48. mínútu.

Þegar sjö mínútur voru eftir skoraði Zlatan svo sigurmark Milan með skemmtilegri bakfallsspyrnu. Þetta var sjöunda mark hans í fjórum leikjum í ítölsku úrvalsdeildinni á tímabilinu. Hann missti af tveimur fyrstu deildarleikjum Milan eftir að hann greindist með kórónuveiruna.

Mörkin úr leik Udinese og Milan má sjá hér fyrir neðan.

Zlatan sneri aftur til Milan undir lok síðasta árs. Hann framlengdi svo samning sinn við liðið í sumar. Hann lék áður með Milan á árunum 2010-12 og varð Ítalíumeistari með liðinu 2011.

Frá því Zlatan kom aftur til Milan hefur hann skorað sautján mörk í 22 leikjum fyrir liðið. Milan hefur ekki tapað leik síðan keppni á Ítalíu hófst á ný eftir hléið vegna kórónuveirufaraldursins.