Sextán milljarða króna hagnaður á krefjandi ári

Þetta kemur fram í ársreikningi Marel sem birtur var eftir lokun markaða í gær. Þar kemur fram að markaðsaðstæður hafi verið krefjandi á árinu í ljósi umróts á heimsmörkuðum og yfirstandandi heimsfaraldurs. EBIT rekstrarhagnaður nam á síðasta ári 166,8 milljónum evra, ígildi 26 milljarða króna, og var 13,5% af tekjum.

Heildareignir félagsins voru 283 milljörðum króna um síðustu áramót og lækkuðu aðeins milli ára. Eigið fé nam 150 milljörðum og eiginfjárhlutfall því 53%. Stjórn Marel hyggst leggja til á næsta aðalfundi að greiddir verði 6,4 milljarðar króna í arð fyrir síðasta rekstrarár. Nemur það 5,45 evrusentum á hlut og samsvarar áætluð heildargreiðsla um það bil 40% af hagnaði ársins.

Afkoman ásættanleg

Að sögn Árna Odds Þórðarsonar, forstjóra Marel, lögðu skjótar ákvarðanir í byrjun árs grunninn að áframhaldandi nýsköpun og stöðugum rekstri á tímum heimsfaraldurs. Hann segir að afkoma ársins sé „vel ásættanleg.“ Mótteknar pantanir hafi verið á pari við fyrra ár en tekjur og rekstrarhagnaður lækkað um 4% á milli ára. Á móti komi að þjónustu- og varahlutatekjur hækkuðu nokkuð og námu 40% af heildartekjum ársins.

„Við enduðum árið með afar góðum fjórðungi þar sem tekjur voru 343 milljónir evra og rekstrarframlegð var yfir 15%. Við nutum meðvindar frá kaupunum á TREIF, en vöru- og þjónustuframboð þeirra var hluti af uppgjöri Marel frá byrjun fjórða ársfjórðungs og hafði jákvæð áhrif á bæði tekjur og framlegð. Staða pantana var góð í árslok og fjárhagsstaða Marel er sterk með hreinar skuldir undir eins árs EBITDA-framlegð,“ segir Árni í tilkynningu frá félaginu. Samningur um kaup á TREIF, þýskum framleiðanda skurðtæknilausna var undirritaður í október í fyrra.

Beina sjónum sínum frekar að Kína og Brasilíu

Stjórnendur félagsins gera ráð fyrir áframhaldandi sveiflum á milli ársfjórðunga, „sérstaklega nú á tímum umbreytinga og óvissu.“

„Til að þjóna þörfum viðskiptavina Marel enn betur mun áhersla á stafræna vegferð og þjónustulipurð aukast enn frekar á næstu árum, sem mun leiða til aukinnar fjárfestingar. Marel sér jafnframt tækifæri í aukinni sjálfvirkni og stafrænni þróun í framleiðslueiningum og þjónustuneti félagsins í þeim tilgangi að bæta enn frekar þjónustu við viðskiptavini, sem þurfa að geta aðlagað framleiðslu og dreifingu hratt að breyttu markaðsumhverfi og kauphegðun neytenda,“ segir í tilkynningu frá félaginu.

Áfram verði lögð áhersla á aukna fjárfestingu í framlínu félagsins í sölu og þjónustu til viðskiptavina til að styðja við frekari vöxt, sem og hagræðingu í framleiðslu og á stoðsviðum. Á árinu 2021, hyggst Marel opna sölu- og þjónustuskrifstofur og sýningarhús í Sjanghæ í Kína og borginni Campinas í Brasilíu. Er þeim ætlað að styðja við „markaðsstarf til að umbylta matvælavinnslu í þessum heimshlutum með framboði af háþróuðum sjálfvirkum kerfum og lausnum,“ að sögn Marel.