Segja Sýn og Nova hafa gert sam­komu­lag við fé­lag tengt nánum ­vini Donalds Trump

Samkvæmt heimildum blaðsins vinnur félagið að því að fjármagna kaupin að hluta með útgáfu skuldabréfs í krónum upp á 8 til 9 milljarða króna og að fyrirtækjaráðgjöf Kviku hafi á síðustu vikum kynnt útgáfuna fyrir lífeyrissjóðum og öðrum innlendum fjárfestum.

Heiðar Guðjónsson, forstjóri Sýnar sem rekur fjarskiptafélagið Vodafone segir í samtali við Vísi að fyrirtækið geti hvorki gefið upplýsingar um stöðu viðræðna eða hvaða aðila um ræðir. Vísir er í eigu Sýnar.

Samkomulag náðist í haust

Sýn tilkynnti um það í október að félagið hafi náð samkomulagi við erlenda fjárfesta um einkaviðræður og helstu skilmála í tengslum við mögulega sölu og endurleigu á óvirkum farsímainnviðum félagsins. Þá kom fram að miðað við fyrirliggjandi skilmála gæti væntur söluhagnaður Sýnar numið yfir sex milljörðum króna gangi viðskiptin eftir.

Í nóvember greindi svo Fréttablaðið frá því fjarskiptafélagið Nova væri í einkaviðræðum við sömu erlendu fjárfesta og Sýn um mögulega sölu og endurleigu á óvirkum farsímainnviðum Nova.

Með óvirkum farsímainnviðum er til að mynda átt við rafkerfi og sendaturna en virkur búnaður á borð við sendana sjálfa verður áfram í eigu íslensku fjarskiptafélaganna. Sýn og Nova reka saman dreifikerfi fyrir farsímaþjónustu í gegnum dótturfélag þeirra Sendafélagið. Ef verður af sölunni feta fjarskiptaskiptafélögin í fótspor erlendra fjarskiptafyrirtækja sem hafa gert sambærilega samninga um sölu á innviðum.

Fram kom í tilkynningu Sýnar í október að ráðgert væri að gerður yrði langtímaleigusamningur við erlendu fjárfestana til 20 ára sem muni tryggja áframhaldandi aðgang félagsins að hinum óvirku farsímainnviðum.

Hluti af Colony Capital

Digital Colony er hluti af samstæðu Colony Capital sem bandaríski auðmaðurinn Thomas J. Barrack Jr. stofnaði. Er hann nú stjórnarformaður samstæðunnar.

Barrack er náinn vinur og stuðningsmaður Donalds Trump, fyrrverandi Bandaríkjaforseta, og var annar stofnanda Rebuilding America Now fjáröflunarnefndarinnar (e. Super PAC) sem safnaði um 23 milljónum Bandaríkjadala fyrir framboð Trumps árið 2016, eða hátt í þremur milljörðum króna.

Þá var Barrack formaður embættistökunefndar Trump og starfaði sem óformlegur ráðgjafi í forsetatíð hans. Árið 2018 lýsti New York Times því hvernig Barrack tók að sér að vera tengiliður Trumps við ráðamenn á Arabíuskaga og reyndi meðal annars að fullvissa sendiherra Sameinuðu arabísku furstadæmanna um að forsetinn væri með fjárfestingar í sambandsríkinu.

Fréttin hefur verið uppfærð: Í fyrri útgáfu kom fram að Thomas J. Barrack Jr. væri forstjóri Colony Capital. Hið rétta er að hann er starfandi stjórnarformaður en Barrack lét af störfum sem forstjóri á síðasta ári.