Skilur ekkert af hverju færslan hennar gersamlega sprakk

Ofsafengin viðbrögð ókunnugra á Twitter voru langt í frá takmark hennar, eins og sést berlega á sakleysislegum efnistökum tístsins.

„Ég á afmæli í dag. Er með svona 5 fylgjendur svo það mun enginn sjá þetta, en ég á samt afmæli,“ skrifaði hún með tilheyrandi lyndistáknum. Með fylgdi mynd af afmælisbarninu sem kollegi hennar tók í vinnunni með tvær kökur í tilefni 26 ára afmælisins.

Meira var það ekki.

Áslaug Birna Bergsveinsdóttir, höfundurinn, segir að hún hafi bara sett tístið í loftið, farið svo að hugsa um eitthvað annað en áður en hún vissi af sprakk tístið einfaldlega.

Á þessari stundu eru um 1.500 manns búnir að læka færsluna og fleiri tugir svarað með hamingjuóskum. Áslaug þekkti kannski svona þrjá þeirra, segir hún.

„Síminn hætti bara ekki í allan dag og fullt, fullt af fólki var að óska mér til hamingju. Ég veit eiginlega ekkert hvað gerðist,“ segir Áslaug í samtali við Vísi. „Ég póstaði þessu bara upp á djókið.“

Nærtækast er að ætla að tilfinningin sem ráðið hafi för hjá flestum lækendum sé vinaleg samúð með stafrænum lítilmagna í umhverfi þar sem nokkrir risar ráða ríkjum hverju sinni, sem er jafnan raunin á Twitter.

Samúðin var þó síst það sem vakti fyrir Áslaugu þegar hún birti afmælismyndina. „Ég var ekkert að leitast eftir því. Ein skýringin sem mér hefur verið gefin á þessu er að afmæli séu einfaldlega bara vinsæl á Twitter. En ég veit það ekki, ég skil enn þá ekkert af hverju svona margir lækuðu þetta.“

Áslaug hefur grætt rúmlega 200 fylgjendur á samfélagsmiðlinum eftir tístið og segist ekki geta annað en verið ánægð með að vera komin af stað með smá framleiðslu á Twitter. Nokkrar aðrar færslur frá henni hafa vakið smá lukku.

Hluti af alþjóðlegri tískubylgju

Segja má að Áslaug sé að nokkru leyti brautryðjandi á Íslandsmarkaði með því að slá svona í gegn með því einu að segja frá hversdagslegum sigri óbreytts borgara.

Þetta er tísttegund sem hefur verið að ryðja sér til rúms alþjóðlega og má á vissan hátt skilja sem grasrótarviðbragð notenda við ægivaldi stórstjarna samfélagsmiðlanna, sem eru auðvitað líklegar til að ráða lögum og lofum á hverjum tíma. 

Innan þessarar nýju greinar fær venjulegasta fólk jafnvel milljónir læka fyrir það annaðhvort að greina frá árangri sínum á einhverju tilteknu sviði eða jafnvel fyrir að deila með örfáum fylgjendum sínum innstu hræringum.

Hörð samkeppni um læk

Tíst Áslaugar er sérstakt, en það er ekki allra vinsælasta tíst Íslandssögunnar. Athugun Vísis hefur leitt í ljós að á innanlandsmarkaði hreppir tíst Jóns Gnarr þann titil, þar sem grínistinn les upp athugasemdir Jóns Vals Jenssonar heitins með röddu Indriða úr Fóstbræðrum.

Annað vinsælt tíst var ætlað erlendum markaði en það var frá Degi Hjartarsyni rithöfundi þegar Íslendingar vöktu heimsathygli á EM í Frakklandi 2016.

Fleiri vinsæl tíst ná sum nokkur ár eftir í tímann en þar sem notendum forritsins hefur fjölgað mjög á síðari árum er ljóst að stærstu tístin eru að verða stærri. Fáein dæmi: