Reginn hefur hagnast um rúmlega þrjá og hálfan milljarð króna það sem af er ári

Í tilkynningu frá Regin segir að afkoma félagsins sé í samræmi við áætlanir og reksturinn sé traustur og fjárhagur sterkur. Greinileg og sterk batamerki séu í viðskiptaumhverfi félagsins.

Áhrif Covid-19 minnka

Samkvæmt tilkynningunni gætir enn nokkurra Covid-19 áhrifa í rekstri félagsins en að þau séu takmörkuð og í takt við áætlanir. 

Þá segir að greiðslugeta og greiðsluvilji viðskiptamanna félagsins sé að mestu kominn í eðlilegt horf.

Eignasafn Regins er metið á 153 milljarða króna

Reginn á alls 113 fasteignir sem eru alls um 382 þúsund fermetrar. Heildarvirði eignanna er 153.235 milljónir króna. Útleiguhlutfall á safni Regins er um 96% miðað við þær tekjur sem 100% útleiga gæfi.

Það er mat stjórnenda að enn gæti óvissu sem tengist Covid-19 faraldrinum en hún fari minnkandi. Forsendur um áhrif innlendrar og erlendrar eftirspurnar á sjóðstreymi einstakra eigna hafa verið endurmetnar.

Stjórnendur félagsins eru bjartsýnir á horfur framundan

Fjárhagsstaða félagsins er sterk og fjárhagsleg skilyrði vel innan marka lánaskilmála, eiginfjárhlutfall 31,1 prósent en skilyrði er 25 prósent. Í lok tímabilsins var handbært fé 2.144 milljónir króna og auk þess hafði félagið aðgang að ónýttum lánalínum að fjárhæð 4.700 milljónir króna í lok tímabilsins.

Góður árangur hefur náðst í rekstri eigna félagsins sem og rekstri í fasteignum. Hluta af þeim árangri má rekja til aukinna áherslna á sjálfbærni og vottun eignasafnsins. Á fyrri helming ársins hafa verið gerðir leigusamningar vegna 13.700 m2 sem er um þriðjungs aukning frá sama tímabili fyrir ári.

Hefur sótt 28 milljarða lánsfjármagns á árinu

Reginn hefur sótt sér 28 milljarða króna lánsfjármagn, bæði hjá lánastofnunum og með skuldabréfaútgáfum. Sé litið til síðustu tveggja ára hefur félagið sótt sér 58 milljarða króna í hagstæðari fjármögnun og þannig lækkað meðalvexti verðtryggðra lána um eitt prósentustig á sama tímabili.