Á þriðja hundrað þúsund börn mis­notuð af kaþólskum prestum

Jean-Marc Sau­vé, for­maður rann­sóknar­nefndar sem fór fyrir skýrslunni, sagði á fundi þar sem skýrslan var kynnt að mis­notkunin hafi verið kerfis­bundin. Þá sagði hann að í stað þess að vernda börnin hafi kirkjan gerst sek um „djúp­stætt, al­gjört og jafn­vel grimmi­legt af­skipta­leysi árum saman.“

Niður­stöðurnar sýna að kirkjan hafi ekki gert nægi­lega mikið til að koma í veg fyrir mis­notkun. Það hafi ekki verið fyrr en fyrir um fimm árum sem kirkjan fór að skipta sér af málum tengdum mis­notkun innan kirkjunnar. Að sögn Sau­vé mun kirkjan þurfa að gera veru­legar úr­bætur til að vinna aftur traust sam­fé­lagsins.

Um er að ræða hátt í 2.500 blað­síðna skýrslu en kaþólska kirkjan í Frakk­landi skipaði rann­sóknar­nefnd til að fjalla um málið árið 2018. Niður­staða nefndarinnar var að flest fórnar­lömb mis­notkunar voru ungir drengir og glímdi meiri­hluti fórnar­lamba enn við af­leiðingar brotanna sem þau urðu fyrir.

Talið er að um þrjú þúsund af 115 þúsund prestum og klerkum kirkjunnar hafi brotið á börnum út frá þeim gögnum sem eru til staðar en nefndin tók það þó fram að lík­lega væru þeir fleiri. Að því er kemur fram í frétt Guar­dian um málið hefur sak­sóknurum verið gert við­vart í nokkrum málum.