Flugfélög aflýstu fjölda flugferða á aðfangadag og í dag, jóladag, eftir hraða útbreiðslu ómíkronafbrigðis kórónuveirunnar en illa hefur gengið að manna áhafnir vegna smita. Þá hafa margir starfsmenn þurft að sæta sóttkví og hafa flugfélög því glímt við tilheyrandi mönnunarvanda.
Flugfélög á borð við Delta hafa óskað eftir því að skyldusóttkví fyrir bólusetta starfsmenn verði fækkað úr tíu dögum niður í fimm og önnur flugfélög hafa í kjölfarið óskað eftir sambærilegum undanþágum fyrir starfsmenn sína.
Samkvæmt vefsíðunni FlightAware hafði rúmlega tvö þúsund flugferðum verið aflýst í gær og enn bættist við nú í morgun. Þá hefur einnig verið mikil seinkun á fjölmörgum flugferðum af sömu ástæðu. Þetta kemur fram í frétt Guardian.