Mótherjar nýliðanna úr Njarðvík ráða ekkert við hina mögnuðu Collier

Aliyah Collier var með 38 stig, 20 fráköst og 12 fiskaðar villur í gær en hún nýtti úr sextíu prósent þriggja stiga skotnýtingu og setti niður fimmtán af átján vítum sínum.

Það er ljóst á gengi Njarðvíkur og tölfræði Collier að til að stoppa Njarðvíkurliðið þarf að hægja á henni. Það hefur gengið mjög illa hjá andstæðingunum í þessari úrslitakeppni og fyrir vikið hefur Njarðvík unnið fimm af sjö leikjum sínum í henni.

Collier varð fyrsta konan í sögu lokaúrslita kvenna til að ná 30-20 leik í fyrsta leiknum í einvíginu á móti Haukum og endurtók leikinn í gærkvöldi. Hún er með 45 framlagsstig að meðaltali í leikjunum tveimur á Ásvöllum í lokaúrslitunum.

Collier hefur verið með 37 framlagsstig eða fleiri í öllum sigurleikjum Njarðvíkurliðsins í úrslitakeppninni en í tapleikjunum hefur nú verið með 25 eða færri framlagsstig. Það leynir sér ekki að Njarðvíkurkonur þurfa á stórleik að halda frá henni og Collier er að líka að skila þeim á stærsta sviðinu.

Hér fyrir neðan má sjá samanburð á tölfræði Aliyah Collier í sigur- og tapleikjum Njarðvíkurliðsins í þessari úrslitakeppni.