Nýbakaðir hjólhýsaeigendur ana út í umferðina án hliðarspegla

Nýverið fjallaði Vísir um mikla sölu á hjólhýsum í sumar sem væri að sögn sölumanns enn meiri en á sama tíma í fyrra. Samkvæmt tölum Samgöngustofu hafa 381 hjólhýsi verið nýskráð í ár en í fyrra voru 646 hjólhýsi nýskráð og árið 2020 voru þau 606 talsins. 

Hins vegar hefur einnig borið á fréttum í sumar um hjólhýsi sem hafa farið út af veginum og nýlega vöktu neytendasamtökin athygli á því að þyngd hjólhýsis hefði verið ranglega skráð. Það er því spurning hvort þessi fjölgun hjólhýsa í umferðinni komi niður á öryggi annarra ökumanna.

Að sögn lögreglu gerist það einstaka sinnum að fólk keyri um með eftirvagna án tilskilinna BE-réttinda. Aftur á móti sé það farið að gerast í auknum mæli að fólk sé ekki með hliðarspegla þegar það ekur út á land með hjólhýsi í eftirdragi en í slíkum tilfellum er fólki gert að snúa við.

Viðvarandi sprenging í nýskráningu hjólhýsa frá 2017

Vísir hafði samband við Samgöngustofu til að forvitnast út í nýskráningar hjólhýsa, réttindi til aksturs á þeim og hvort fólk sé almennt meðvitað um réttindi sín þegar kemur að hjólhýsum.

Að sögn Þórhildar Elínar Elínardóttur, upplýsingafulltrúa Samgöngustofa, hefur nýskráning á hjólhýsum í ár verið mikil en þó í samræmi við nýskráningar undanfarin ár. Árið 2017 varð sprenging í nýskráningum hjólhýsa og hafa þær haldist mjög miklar síðan.

Nýskráning á hjólhýsum fór úr því að vera 331 árið 2016 yfir í að vera 624 árið eftir. Síðan þá hafa selst meira en 600 hjólhýsi á hverju ári, ef frá er talið árið 2019 þegar nýskráningar voru aðeins 476. Nú í lok júnímánaðar í ár hafa selst 381 hjólhýsi. Framreikni maður þá tölu fyrir allt árið stefnir í að 2022 verði metár í sölu hjólhýsa. Sá reikningur er þó óvísindalegur og eru allar líkur á að salan snarminnki eftir sumarið.

Undir fólki komið að hafa réttindi sín á hreinu

Um réttindi til að keyra með eftirvagna sagði Þórhildur „Það er auðvitað alltaf gott þegar fólk er að fara toga eitthvað, að skoða bæði sín eigin réttindi og líka ökutækið sitt, hvað ökutækið á að geta dregið.“

Hins vegar sé það undir fólki komið að hafa þessi mál hreinu, rétt eins og með önnur ökuréttindi, sagði Þórhildur og bætti við „ef fólk er ekki með þessi réttindi þá er ekki mjög flókið mál að ná sér í þau en fólk þurfi að gera það, bæði til að öðlast leiknina og réttindin formlega,“ segir Þórhildur.

„Það sem er svolítið merkilegt varðandi B- og BE-réttindi er að það urðu breytingar 1997 á ökuréttindum þannig að við sem erum gömul og tókum prófið fyrir löngu síðan megum samkvæmt ökuskírteinaskráningunni keyra þyngri hlöss en þeir sem tóku það seinna.“

Þar vísar Þórhildur í að vegna breytinga á lögum skiptir máli hvenær viðkomandi fékk almenn ökuréttindi hvort hann geti ekið með þyngri eftirvagna. Þeir sem fengu almennt ökuskírteini fyrir 15. ágúst 1997 fengu bæði B- og BE-réttindi en þeir sem fengu almennt ökuskírteini eftir það fengu einungis B-réttindi.

Þegar fólk er með B-ökuréttindi má aka um með eftirvagn í dragi ef samanlögð þyngd bíls og tengivagns eru 3,5 tonn eða minna. Hins vegar fer samanlögð þyngd bíls og eftirvagns gjarnan yfir þessi 3,5 tonn en í slíkum tilfellum þarf maður BE-réttindi. Þau veita manni rétt til að keyra um með eftirvagn þar sem samanlögð þyngd bíls og eftirvagns má ná upp í sjö tonn. Til að fá slík réttindi þarf maður að sækja fjóra verklega tíma hjá ökukennara og taka verklegt próf.

Hliðarspeglar meira mál en réttindaleysi

Vísir hafði einnig samband við Árna Friðleifsson, aðalvarðstjóri umferðardeildar hjá Lögreglunni á höfuðborgarsvæðinu, til að forvitnast hvort lögreglan lenti mikið í ökumönnum sem keyrðu um með hjólhýsi í eftirdragi án þess að vera með BE-réttindi.

Að sögn Árna eru það einn og einn sem keyri um réttindalausir en það sé ekki algengt. Hins vegar er það farið að gerast í auknum mæli að fólk keyri um án hliðarspegla. Í slíkum tilfellum er fólki gjarnan gert að snúa við aftur til að kaupa sér viðunandi búnað.

„Það sem okkur finnst meira um en undanfarin ár er að fólk er ekki með hliðarspegla,“ sagði Árni.

Loks sagði Árni um fólk sem æki án hliðarpsegla „Við höfum undanfarin ár, á stórum ferðahelgum, einfaldlega snúið fólki við og látið það fara aftur í borg óttans að kaupa hliðarspegla.“