Segir að enginn hafi verið gagnrýndur meira en Maguire

Maguire var settur á varamannabekkinn hjá Manchester United eftir slaka frammistöðu í fyrstu tveimur deildarleikjum liðsins á tímabilinu. Síðan þá hefur United unnið fjóra deildarleiki í röð.

Þótt frammistaðan með United hafi verið upp og ofan hefur Maguire jafnan spilað vel fyrir enska landsliðið. Það gerðist þó ekki í gær en hann fékk á sig vítaspyrnu, sem fyrsta mark Þjóðverja kom úr, og leit einnig illa út í öðru marki þýska liðsins. Englendingar lentu 0-2 undir en komu til baka og leikurinn endaði með 3-3 jafntefli.

Shaw tók til varna fyrir Maguire eftir leikinn á Wembley og sagðist aldrei hafa kynnst viðlíka gagnrýni á einn leikmann.

„Harry er frábær leikmaður og frábær karakter. Hann hefur fengið mikla gagnrýni, sennilega meiri en ég hef áður kynnst,“ sagði Shaw við BBC. Hann skoraði fyrsta mark Englands í leiknum.

„Hann fer aldrei í felur og er alltaf til staðar. Það eru til leikmenn sem fela sig og vilja ekki vera í kastljósinu en hann er alltaf þar. Það sýnir styrkinn og karakterinn sem hann býr yfir.“

Shaw hefur fulla trú á því að Maguire komi sterkur til baka. „Allir vita að hann er ótrúlegur leikmaður. Í augnablikinu er sjálfstraustið ekki til staðar því það er eins og allur heimurinn sé á móti honum. Það er erfitt en við öll stöndum þétt við bakið á honum því hann er mikilvægur leikmaður. Það að hann hafi spilað báða leikina núna sýnir hvað Gareth [Southgate, landsliðsþjálfari Englands] hefur mikla trú á honum. Fólk verður að skilja að hann er stór hluti af enska liðinu og verður að sætta sig við það.“