Tuttugu há­degis­verðir, rán­dýr kvöld­matur og ýmsar jóla­gjafir

Þetta kemur fram í minnisblaði Bankasýslu ríkisins um málsverði, tækifærisgjafir og sérstök tilefni í tengslum við sölu á hlut í Íslandsbanka. Bjarkey Olsen Gunnarsdóttir, þingmaður Vinstri grænna, óskaði eftir  minnisblaðinu á fundi Bankasýslunnar og fjárlaganefndar Alþingis í apríl á þessu ári. 

Í minnisblaðinu segir að ráðningu Bankasýslunnar á fjármálaráðgjafa, söluráðgjöfum og lögfræðilegum ráðgjöfum hafi lokið þann 19. apríl síðastliðinn. Bankasýslan átti enga vinnufundi þar sem boðið var upp á veitingar fyrr en ráðningu þeirra var lokið. 

Á tímabilinu 23. apríl 2021 til 13. apríl 2022 átti Bankasýsla ríkisins tuttugu vinnufundi þar sem veitingar voru í boði. Með á fundunum voru fulltrúar ýmissa fjármálafyrirtækja. Fjármálafyrirtækin voru eftirfarandi:

ABN AMRO, Arctica Finance, Barclays, Fossar markaðir, Íslandsbanki, Íslensk verðbréf, Íslenskir fjárfestar (nú ACRO verðbréf), Kvika banki og Landsbankinn.

Fundirnir áttu sér yfirleitt sér stað í hádeginu og segir í minnisblaðinu að um sé að ræða hóflegar veitingar. Kostnaður við hvern þátttakenda sé því óverulegur. 

Rándýrir fagnaðarkvöldverðir

24. september og 30. nóvember árið 2021 voru haldnir kvöldverðir þar sem frumútboði á hlutum í Íslandsbanka var fagnað. Starfsmenn Bankasýslunnar sóttu báða þessa fundi. 

Á fyrri fundinum var fagnað með fyrirtækjaráðgjöf og verðbréfamiðlun Íslandsbanka. Kostnaður á hvern þátttakanda var um 34 þúsund krónur. Kostnaðurinn var greiddur af bankanum. 

Á þeim seinni var fagnað með fulltrúum þriggja umsjónaraðila, tveggja fjármálaráðgjafa og þriggja lögfræðilegra ráðgjafa. Kostnaður á hvern þátttakanda var um 48 þúsund krónur. Kostnaðurinn var greiddur af umsjónaraðilunum þremur sem voru Citibank, Íslandsbanki og JP Morgan.

Flugeldur, kokteilasett og vín

Um jól og áramót 2021 fengu starfsmenn Bankasýslunnar tækifærisgjafir frá sex aðilum. Með gjöfunum var verið að þakka starfsmönnum fyrir gott samstarf í tengslum við frumútboðið. 

Frá ACRO verðbréfum fengu starfsmenn fjögur þúsund króna vínflösku, frá Íslenskum verðbréfum tvær vínflöskur sem samtals kostuðu átta þúsund krónur, konfektkassa frá Landsbankanum sem kostaði 4.067 krónur, kokteilasett frá lögmannsstofunni BBA/Fjeldco sem kostaði tuttugu þúsund krónur og léttvínsflösku og smárétti frá verðbréfamiðlun og fyrirtækjaráðgjöf Íslandsbanka sem kostaði fjórtán þúsund krónur.

Þá fengu starfsmenn einn flugeld að andvirði 2.500 króna sem gjöf frá vin forstjórans sem starfar hjá fjármálafyrirtæki. Vinurinn hefur staðfest að um sé að ræða vinagjöf og tengist því ekki frumútboðinu.