Ráðinn nýr fjár­mála­stjóri Play

Frá þessu segir í tilkynningu frá Play. Þar segir að Ólafur Þór hafi áður gegnt starfi forstjóra, aðstoðarforstjóra og framkvæmdastjóra fjármálasviðs Skeljungs hf. á árunum 2019 til 2022. 

Þar áður gegndi hann ýmsum stjórnunarstöðum í atvinnulífinu, hefur verið sjálfstætt starfandi ráðgjafi, sinnt stjórnarsetu í nokkrum félögum og þá var hann endurskoðandi og meðeigandi hjá PricewaterhouseCoopers. Ólafur Þór sinnti jafnframt kennslu við viðskiptadeild Háskólans í Reykjavík. Hann er viðskiptafræðingur frá Háskóla Íslands og er löggiltur endurskoðandi.

Haft er eftir Ólafi Þór að hann sé þakklátur fyrir það tækifæri að fá að vera þátttakandi í áframhaldandi uppbyggingu Play sem sé að hans mati á mjög áhugaverðum stað. „Ég hlakka til að fá að takast á við þau fjölmörgu verkefni sem eru framundan og vonast til þess að reynsla mín og þekking úr ólíkum atvinnugreinum komi félaginu að gagni.“

Þá er haft eftir Birgi Jónssyni, forstjóra Play,  að það sé félaginu einstök ánægja að kynna Ólaf Þór til leiks

enda mikill fengur að honum fyrir félagið. 

„Hann býr yfir gífurlegri reynslu úr fjölbreyttum áttum og er góð viðbót við sterkan stjórnendahóp PLAY. Nú þegar hann tekur við okkar sterka fjármálateymi getum við stigið ákveðnum skrefum fram á við og haldið áfram að hækka flugið. Ég býð Ólaf Þór hjartanlega velkominn um borð.“