Svona verður ný álma Kefla­víkur­flug­vallar

Þetta var kynnt á morgunfundi Isavia í dag. 24 flugfélög munu fljúga með 7,8 milljónir farþega um Keflavíkurflugvöll á næsta ári og að sögn Isavia verður það þriðja stærsta árið í sögu flugvallarins. Flugfélögin 24 verða með áætlunarflug til og frá áttatíu áfangastaða í Evrópu og Norður-Ameríku.

Nýr vefur, kefplus.is, hefur verið settur á laggirnar til að veita innsýn í framtíð Keflavíkurflugvallar og hvernig unnið verður að þróun hans. Þar má meðal annars sjá tölvuteiknaðar myndir af því hvernig ný austurálma flugvallarins á að líta út. 

Stefnt er að því að opna álmuna í áföngum frá lokum 2023 og að endanleg verklok séu árið 2024. Álman verður 25 þúsund fermetrar og er hönnuð með tilliti til framtíðar stækkunaráforma. 

„Við viljum leggja okkar lóð á vogaskálarnar, annars vegar þar sem við finnum til ábyrgðar þegar kemur að þessum mikilvægu málum og hins vegar teljum við raunverulegt samkeppnisforskot og langtímavirðisauka felast í því að sinna sjálfbærni af alvöru,“ er haft eftir Sveinbirni Indriðasyni, forstjóra Isavia, í tilkynningu.