Slaufa auglýsingum á Stöð 2+

„Við tökum þessa tímamótaákvörðun til þess aðauka upplifun áskrifenda okkar og trúum því að þeir taki vel í þessa breytingu, “ segir  Þórhallur Gunnarsson, framkvæmdastjóri fjölmiðla Sýnar í tilkynningu.

Þar segir Þórhallur að streymisveitan Stöð 2+ hafi tekið miklum breytingum undanfarin ár. 

„Við höfum aukið framleiðslu á íslensku sjónvarpsefni margfalt og leggjum sérstaka áherslu á fjölbreytt evrópskt gæðaefni. Við erum einstaklega stolt af miklu úrvali barnaefnis sem er annað hvort textað eða talsett á íslensku. Svo má ekki gleyma eldra sjónvarpsefni eins og Fóstbræðrum, Stelpunum, Steypustöðinni og fjölmörgum íslenskum þáttum sem lifa góðu lífi á Stöð 2+.“

Þórhallur segist vonast til að mæta óskum áskrifenda Stöð 2+ með þessum breytingum. Þá kom fram í viðtali við Þórhall í Bítinu á Bylgjunni í morgun að áskriftarverð á Stöð 2+ muni hækka úr 3990 krónum í 4990 krónum þann 1. mars. Verð á sjónvarpsáskriftum eins og fleiri vörum í samfélaginu hefur farið hækkandi undanfarnar vikur og mánuði.

Vísir er í eigu Sýnar sem á líka Stöð 2+.