Methagnaður hjá Loðnuvinnslunni

Í tilkynningu segir að hagnaður Loðnuvinnslunnar í fyrra, eftir skatta, hafi verið 3,483 milljarðar króna, sem er nærri því þreföldun á milli ára. Tekjur fyrirtækisins voru 18,180 milljarðar og jukust um 45 prósent á milli ára.

Eigið fé Loðnuvinnslunnar í árslok var 14,9 milljarðar króna. Ákveðið var á aðalfundi félagsins sem haldinn var á dögunum að greiða tuttugu prósenta arð til hluthafa. Það eru 140 milljónir en Kaupfélag Fáskrúðsfirðinga er stærsti hluthafi Loðnuvinnslunnar með um 83 prósenta eignarhlut.

Í áðurnefndri tilkynningu segir að 350 af 750 íbúum Fáskrúðsfjarðar séu meðlimir í Kaupfélaginu og að reynt sé að taka allar ákvarðanir um starfsemina svo þær gagnist heimabyggð. Eignarhaldið geri það nær ómögulegt að selja fiskveiðiheimildir frá byggðarlaginu í hagnaðarskyni.

Stjórnir bæði Loðnuvinnslunnar og Kaupfélagsins útdeildu nýverið styrkjum sem samsvarar 32,6 milljónum króna. Þeir fóru meðan annars til Ungmennafélagsins Leiknis, sem fékk sautján milljónir króna, og til félags um Franska daga, sem fékk 1,8 milljón til að halda bæjarhátíðina Franska daga.

Þá fékk starfsmannafélag Loðnuvinnslunnar tíu milljónir. Björgunarsveitin Geisli fékk eina milljón og Hollvinasamtök Skrúðs fengu milljón til áframhaldandi uppbyggingar félagsheimilisins Skrúðs.