Rýmingaráætlun fyrir Grindavík komin út

Jón Þór Stefánsson skrifar 5. nóvember 2023 18:33

Þrjár flóttaleiðir eru úr Grindavíkurbæ komi til rýmingar. Vísir/Egill

Rýmingaráætlun fyrir Grindavík hefur verið birt á vefsíðu bæjarfélagsins. Þar er tilmælum komið á framfæri til bæjarbúa varðandi mögulega rýmingu kæmi til eldgoss sem myndi ógna byggð í Grindavík. Áætlunin hefur verið birt á íslensku, ensku, og pólsku.

„Í skipulagi almannavarna er rýming hluti af mótvægisaðgerðum til að draga úr áhrifum hættu á samfélag og íbúa þess, áður en neyðarástand á sér stað eða á meðan neyðarástand varir. Það felur í sér að íbúar flytja á öruggari stað og síðan að þeir komist öruggir heim aftur í lok neyðarástands. Til að rýming gangi vel fyrir sig er mikilvægt að til sé áætlun um framkvæmd rýminganna,“ segir í áætluninni.

Hér má sjá kort af Grindavíkurbæ sem má finna í rýmingaráætluninni.Grindavíkurbær

Á korti sem er birt í rýmingaráætluninni, hefur Grindavík verið skipt í nokkur hverfi. Þá eru þrjár flóttaleiðir úr bænum: ein vestur Nesveg, önnur norður um Grindavíkurveg, og sú þriðja austur Suðurstrandaveg. Fyrir miðju kortsins er Íþróttasvæði bæjarins sem verður söfnunarmiðstöð.

Þá er sérstökum upplýsingum komið á framfæri í eins konar tímaröð yfir það sem fólk þarf að gera, bæði í undirbúningi fyrir rýmingu, og svo ef til hennar kæmi.

Listinn er eftirfarandi:

Undirbúningur: Að allir fjölskyldumeðlimir séu upplýstir um áætlun fjölskyldunnar

Boðun: SMS um rýmingu kemur frá Neyðarlínunni (112)

Frágangur húsa: Loka gluggum. Aftengja rafmagnstæki. Viðlagakassinn

Heimili yfirgefið: Límið miða á áberandi stað í glugga eða hurð sem snýr út á götu.

Hugið að nágrönnum og samstarfsfólki ef hægt er

Akið með fyllstu aðgát innan sem utanbæjar

Takið upp gangandi flóttafólk ef rými er í bílnum

Söfnunarmiðstöð innan Grindavíkur verður í íþróttamiðstöð Grindavíkur

Tilkynnið um þörf á aðstoð og slys í 112: Sé ekkert símasamband setjið hvíta veifu á hurð eða í glugga

Skráning í fjöldahjálparstöð utan Grindavíkur

Þá er einnig bent á að börn í leik- og grunnskólum séu á ábyrgð foreldra og forráðamanna sinna.

Mælst er til þess að foreldrar séu meðvitaðir um dagskrá barna sinna í skólanum. Það er að segja hvort þau sé í skólastofu eða í íþróttum eða sundi.

Jafnframt eru foreldrar hvattir til að sækja börn sín fótgangandi ef kostur er á.

Einnig hefur hver stofnun í Grindavík sína rýmingaráætlun sem fólki ber að kynna sér. Þá segir að sérstakt umferðarskipulag sem gildi við rýmingu sem fólki ber að kynna sér.

„Ef lögreglustjóri gefur út fyrirmæli um rýmingu er íbúum skylt að rýma hús sín,“ segir jafnframt í áætluninni.

Rýmingaráætlun á Íslensku

Rýmingaráætlun á ensku

Rýmingaráætlun á pólsku

Rýmingaráætlun fyrir stofnanir

Eldgos og jarðhræringar Eldgos á Reykjanesskaga Almannavarnir Slysavarnir