Ræddu sam­runa Warner og Paramount

Engar formlegar viðræður eru sagðar hafa átt sér stað þótt forstjórarnir hafi talað um þetta sín í milli, samkvæmt frétt Wall Street Journal.

Bæði fyrirtækin eru taldir risar á sviði fjölmiðla og framleiðslu afþreyingarefnis en Warner á til að mynda CNN, TNT HBO og fleiri stöðvar auk streymisveitunnar Max. Paramount á samnefnt kvikmyndaframleiðendafyrirtæki og fjölda sjónvarpsstöðvar eins og MTV, Comedy Central og CBS, auk þess sem fyrirtækið rekur streymisveituna Paramount +.

Forsvarsmenn móðurfélags Paramount, sem heitir National Amusements, hafa verið að ræða mögulega sölu á félaginu og hafa meðal annars rætt við forsvarsmenn Skydance Media og RedBird Capital um möguleg kaup.

Zaslav hefur á sama tíma sagt opinberlega að hann hafi áhuga á mögulegum samningi við Paramount. Sameinað félag ætti auðveldara með að berjast gegn yfirráðum fyrirtækja eins og Netflix og Amazon á streymismarkaði og veita Warner aðgang að miklu íþróttaefni í Bandaríkjunum.

Sjá einnig: Streymisstríðið tekur stakkaskiptum

WSJ segir líklegt að samkeppnisyfirvöld myndu setja sig gegn samruna Warner og Paramount.

Í frétt CNBC segir að forsvarsmenn Comcast, sem á meðal annars NBC Universal, gætu verið tilbúnir til viðræðna um samruna við Warner Bros. Discovery. Universal er stærra félag en Paramount svo yfirvöld gætu haft meiri áhyggjur af slíkum samruna en honum fylgdu þó ekki miklar skuldir Paramount.

Warner Bros. Discovery er einnig hlaðið skuldum eftir samruna Warner Bros. og Discovery. Zaslav hefur sagt upp þúsundum starfsmanna á undanförnum átján mánuðum og hætt við fjölmörg verkefni til að spara peninga. Þar á meðal eru verkefni sem voru nánast tilbúin.

Síðasti samruni af sambærilegri stærð, samruni Disney og hluta Fox, átti sér stað í stjórnartíð Donalds Trump. Ríkisstjórn Joe Biden hefur lagt mun meira púður í að sporna gegn stórum samrunum vestanhafs.