Átu yfir sig og höfðu með sér nesti að áti loknu

Nokkurt uppnám ríkir nú í Facebook-hópnum Íslendingar á Spáni Costa Blanca eftir að Amanda Sunneva Joensen upplýsti um það sem hún kallar siðlaust athæfi Íslendinga á hlaðborði. Hún deilir lýsingum Karls Kristjáns Hafsteins Guðmundssonar sem varð vitni að ósköpunum. Sjálf hafi hún ekki orðið vitni að hamstrinu en þætti vænt um ef hægt væri að upplýsa um hverjir voru þar að verki?

Siðlaust ofát

Pistill Karls Kristjáns sem Amanda deilir segir af íslenskri græðgi á hlaðborði en uppselt var á viðburð sem boðað hafði verið til af þeim Amöndu og Gumma og fram fór á veitingastðanum La Fiorentina á sprengidag. Kom þar í ljós að margur Íslendingurinn kann ekki að umgangast hlaðborð heldur ræður græðgin ríkjum.

„Amanda og Gummi endurgreiddu því mörgum og ljóst er kvöldið er í stórtapi, því miður! Ástæðurnar eru nokkrar. Um 20 manns, fjórði hluti gestanna, fengu ekkert saltkjöt þökk sé græðgi annarra gesta! Helstu skýringarnar eru:

• Fólkið sem kom fyrst að hlaðborðinu mokaði margt rúmu kílói af kjöti á sinn disk. Það var gert ráð fyrir 450 grömmum á mann, tvöfalt meiru kjöti en þegar skammtað er á diska!
• Fólk fór aftur og aftur og fékk sér ábót áður en aðrir komust sína fyrstu ferð að hlaðborðinu! Fjórðungur varð því útundan.
• Margir fóru snemma af staðnum með sjálftekið kjöt í álpappír, pinklum og töskum. Það var tekið eftir ykkur.
• Kom berlega í ljós að fólk kann sig ekki. Græðgin og tillitsleysið var algjört. Þetta sama fólk fór snemma af staðnum enda þurfti það að komast heim til að leggja sig eftir ofátið!
• Það eina sem er eftir hjá þeim siðlausustu er að þykjast ekkert hafa fengið og heimta endurgreiðslu!

Skammast sín fyrir að vera Íslendingur

Pistlahöfundur gerir ekki ráð fyrir því að þetta fólk biðji Amöndu og Gumma afsökunar á framferði sínu heldur muni það þegja þunnu hljóði og muni ekki einu sinni þakka fyrir sig.

„Á þessum sprengidegi skammaðist ég mín fyrir að vera Íslendingur! Eiginlega í fyrsta sinn,“ segir Karl Kristján sem Amanda Sunneva Joensen vitnar í en honum er ekki um sel:

„Amanda og Gummi stóðu sig framúrskarandi vel og þessi græðgi kom svo sannarlega aftan að þeim!“

Nokkrar umræður hafa skapast um efni pistilsins en enn hefur ekki tekist að upplýsa um hverjir fóru fram úr sér í ofáti. Sumir eru á því að ekki sé kannski vert að gera athugasemd við ofát á sjálfan sprengidaginn en það að hafa með sér nesti eftir slíka veislu sé fyrir neðan allar hellur.

Pistilinn má sjá í heild að neðan.