„Vildi að við hefðum sömu sam­keppni í öðrum stöðum“

Eini maðurinn sem getur í raun svarað því er landsliðsþjálfarinn Åge Hareide sem ræddi við Vísi í vikunni.

„Ég hef séð Kristian spila og meðal annars gegn Bodö/Glimt hér í Noregi í síðustu viku. Það sem hefur heillað mig er að hann hafi brotið sér leið inn í lið Ajax þegar það átti í miklum vandræðum. Það var skipt um þjálfara þarna og íþróttastjóra, og ýmis vandamál komið upp, en það er aðdáunarvert að sjá hvað þjálfarinn John van 't Schip hefur mikla trú á Kristiani því hann spilar honum stöðugt. Hann hefur staðið sig vel í að festa sig svona í sessi,“ segir Hareide.

Kristian, sem varð tvítugur í janúar, braut sér leið inn í aðallið Ajax snemma á þessari leiktíð, þegar liðið var hreinlega í fallbaráttu, og hefur nú spilað nítján leiki í hollensku úrvalsdeildinni og skorað sex mörk. Ajax tókst að fikra sig upp töfluna en eftir slæmt gengi í allra síðustu leikjum er liðið í 5. sæti og langt á eftir toppliðunum.

Ajax er einnig komið í 16-liða úrslit Sambandsdeildar Evrópu og mætir þar Aston Villa næstu tvo fimmtudaga, áður en að EM-umspilinu kemur. Liðið þurfti þó framlengingu gegn Bodö/Glimt til að slá norska liðið út í síðustu viku.

Kristian hefur spilað sex Evrópuleiki í vetur og sífellt bætt í reynslubankann, og hann spilaði sinn fyrsta og eina A-landsleik í nóvember, í 4-2 tapinu gegn Slóvakíu, en var skipt af velli í hálfleik.

Kristian hefur eins og fyrr segir heillað Hareide:

„En ef við horfum á okkar lið þá er erfiðast að komast á miðjuna. Þar er mesta samkeppnin. Ég vildi að við hefðum sömu samkeppni í öðrum stöðum. Við eigum svo marga góða miðjumenn og stundum þarf að skilja eftir menn sem hafa alveg hæfileikana til þess að spila. Ég verð að finna út hver er upp á sitt besta 21. mars.“

Ísland og Ísrael mætast í Búdapest 21. mars í undanúrslitum umspils um sæti á EM. Sigurliðið mætir svo sigurliðinu úr leik Bosníu og Úkraínu í úrslitaleik um sæti á EM og fer sá leikur fram í Bosníu eða Póllandi.