Hafa samið við Foss­vélar um fram­kvæmdir vegna Hvamms­virkjunar

Frá þessu segir í tilkynningu frá Landsvirkjun. Þar kemur fram að alls hafi borist sex tilboð í verkið og hafi Fossvélar átt lægsta tilboðið sem hafi hljóðað upp á 1,2 milljarða króna eða 74 prósent af kostnaðaráætlun. Hæsta tilboð hafi numið 105 prósent af kostnaðaráætlun.

„Í samningnum felst að Fossvélar leggja 3 km langan aðkomuveg inn á virkjunarsvæði Hvammsvirkjunar, þ.e. frá endurbættum Hvammsvegi sem lokið var við fyrr á árinu og að væntanlegu stöðvarhúsi. Efnið til vegagerðarinnar verður sótt í frárennslisskurð virkjunarinnar.

Þá munu Fossvélar einnig undirbúa vinnubúðaplan á jörð Landsvirkjunar, Hvammi 3, en þegar framkvæmdir standa sem hæst árið 2027 munu um 400 manns starfa þar.

Loks felst svo í samningnum að hefja framkvæmdir við fiskistiga. Fiskistigi og seiðafleyta greiða för göngufisks milli Hagalóns og árfarvegar neðan stíflu.

Fossvélar hefjast handa nú í desember, en áætluð verklok eru í nóvember á næsta ári.

Reiknað með losuninni

Landsvirkjun gerir ríkar kröfur til samstarfsfyrirtækja um að draga úr kolefnisspori sínu og aðstoðar við það. Megintæki við ákvarðanatöku er innra kolefnisverð. Það þýðir að losun – eða öllu heldur framtíðarkostnaður vegna losunar – er reiknuð inn í allar stærri fjárhagsákvarðanir, allt frá innkaupum á rekstrarvörum og yfir í val á nýjum virkjanakostum. Kolefniskostnaður vegna framkvæmda Fossvéla er áætlaður 60 milljónir kr,“ segir í tilkynningunni.