Gerir ekki upp á milli Arons og Óla Stef: „Verður mikill söknuður af honum“

Aron hringdi í Snorra Stein í síðustu viku og greindi honum frá ákvörðun sinni sem lands­liðsþjálfarinn hefur mjög góðan skilning á því þrátt fyrir að gengi Arons innan vallar hafi verið framúr­skarandi hafa meiðsli hrjáð hann yfir langan tíma.

„Við áttum bara gott spjall um það og hann út­skýrði bara hvað vakir fyrir honum með þessu og ég hef bara mjög góðan skilning á þessu, er aðeins inni í hans meiðslasögu og veit hvað hann þarf að glíma við dags dag­lega. Að hann hafi fundið það hjá sjálfum sér, þekkt sinn vitjunar­tíma hvað þetta varðar, er bara virðingar­vert. Þetta er stór ákvörðun að taka fyrir alla hand­bolta­menn. Hvað aldur varðar átti Aron kannski eitt­hvað smá eftir en maður ber bara virðingu fyrir þessu og skilur hann á margan hátt.“

Kom þetta lands­liðsþjálfaranum á óvart?

„Svona já og nei. Auðvitað höfum við Aron átt alls konar spjöll. Stærsta gul­rótin fyrir hann voru kannski Ólympíu­leikarnir, að komast aftur á þá. Þegar að það klikkaði hjá okkur að komast á Ólympíu­leikana í París horfði hann alveg í og talaði um Ólympíu­leikana í Los Angeles árið 2028 þannig ég var svo sem alltaf að gæla við að hann gæti þraukað fram að því. Svo hefðum við bara þurft að finna út úr því í hvaða hlut­verki það hefði verið. En á sama fór hakan á mér ekkert í gólfið þegar að símtalið frá honum kom og hann út­skýrði mál sitt. En auðvitað er það alltaf þannig, þegar svona risa prófílar leggja skóna á hilluna, að það hefur alltaf ein­hver áhrif og maður er svona hugsi eftir það.“

Áhrifin eiga eftir að koma í ljós

Aron hefur verið máttar­stólpi í ís­lenska lands­liðinu frá því að hann steig sín fyrstu skref með liðinu árið 2008. Alls lék hann 184 A-lands­leiki, skoraði heil 694 mörk og var hluti af bronsliði Ís­lands á EM árið 2010. Sem fyrir­liði hefur hann farið fyrir ís­lenska lands­liðinu og áhrifin af brott­hvarfi hans eiga eftir að koma í ljós, nú þurfi aðrir að stíga upp.

Hvaða þýðingu hefur þetta fyrir ís­lenska lands­liðið?

„Auðvitað kemur þetta til með að hafa ein­hverja þýðingu. Hvaða þýðingu nákvæm­lega fáum við ekki al­menni­legt svar við fyrr en á næsta stór­móti í janúar. Þegar að þú ert á stóra sviðinu og það reynir á þegar til­finningarnar eru upp og niður eins og gengur og gerist. Þá kannski fyrst reynir á hópinn en á margan hátt erum við vanir því að spila án hans, hann hefur náttúru­lega sína meiðslasögu og við höfum oft þurft að vera án hans í “minna mikilvægari leikjum“ það er að segja ekki á stór­móti. 

Hvað nákvæm­lega kemur til með að gerast ætla ég ekki að fara rýna í eða pæla í of mikið. Ég bara vel næsta hóp og við tökum bara á því. Ég verð ekki með hugann við Aron þegar kemur að því og ég ekkert áhyggjur af hópnum sem slíkum. Það eru miklir leið­togar innan liðsins, aðrir taka bara við keflinu af Aroni og þannig virkar þetta líka. Vonandi virkar það á jákvæðan hátt hvað þá sem fyrir eru varðar, þeir bara taka við keflinu og vaxa í þau hlut­verk sem Aron hefur sinnt sem fyrir­liði.“

Óli Stef, Aron, Karabatic og Mikkel Hansen

Aron hefur undan­farna ára­tugi verið á meðal bestu hand­bolta­manna heims og hvar sem hann hefur spilað hafa bikarar skilað sér í skápa hans félaga, stór­lið á borð við Kiel, Barcelona, Vezprém, Ála­borg og FH hafa notið góðs af því að hafa Aron innan sinna raða, ferill sem inni­heldur nokkra tugi stórra titla að renna sitt skeið og enn gæti bæst í titla­safnið fram að lokum yfir­standandi tíma­bils.

Hvaða sess hefur Aron skipað sér í hand­boltanum, bæði hvað Ís­land varðar en einnig á alþjóða­vísu?

„Ég ætla ekki að gera upp á milli þeirra en hann og Ólafur Stefáns­son eru fyrir mína parta bara okkar lang, lang, lang bestu hand­bolta­menn sem við höfum átt. Ég spilaði með þeim báðum og það er erfitt að lýsa því hversu góðir þeir eru. Það var bara allt þarna, aldrei vesen og þú þurftir ekki að hafa áhyggjur af neinu. Á alþjóða­vísu eru þetta fyrir mína parta eru þetta Kara­batic, Mikkel Han­sen og Aron Pálmars­son. Hann er bara þar. Titlarnir, af­rekin og liðin sem hann hefur spilað með held ég að tali bara sínu máli. Þetta er fárán­lega góður leik­maður sem er að hætta og verður mikill söknuður af honum fyrir alla sem horfa á hand­bolta. “