„Ætluðum ekki að leyfa þeim að fagna titli á okkar heima­velli“

„Við vildum verja heimavöllinn, við ætluðum ekki að leyfa þeim að fagna titli á okkar heimavelli. Með bakið upp við vegg svöruðum við vel, margir sem lögðu sitt af mörkum. Ég er mjög stoltur af þessum hópi“ sagði Haliburton í viðtali eftir leik sem má sjá hér fyrir neðan.

Haliburton hefur verið að glíma við tognun í kálfa og var spurður út í meiðslin sem héldu honum næstum því frá keppni í gærkvöldi.

„Þetta er úrslitaeinvígið, þetta er bara úrslitaeinvígið. Við verðum allir að gefa allt sem við eigum og ég mun gefa allt sem ég á. Strákarnir hafa stutt við mig allt tímabilið og sérstaklega í kvöld, það þýðir heilmikið fyrir mig… Ég hef nokkra daga núna til að jafna mig og koma mér aftur á skrið fyrir næsta leik [aðfaranótt mánudags]“

Framundan er fyrsti oddaleikur í úrslitaeinvígi NBA síðan 2016 og ljóst er að Pacers gætu lyft fyrsta titli í sögu félagsins.

„Þetta er leikur smáatriða, við verðum að hugsa vel um boltann þegar við höfum hann og sækja fráköstin þegar þau detta niður. Bara einn leikur eftir í þessari seríu og maður minn lifandi, við trúum“ sagði Haliburton en viðtalið við hann má sjá í spilaranum að ofan.