Eiginkona stjórnar­manns keypti ó­vart í bankanum

Stefán Pétursson, varaformaður stjórnar Íslandsbanka, sendi út kauphallartilkynningu í kvöld þar sem hann greinir frá því að eiginkona sín, Ingunn Guðrún Árnadóttir, hafi óvart tekið þátt í hlutafjárútboði bankans í gegnum einkabankaþjónustu Arion banka. 

Tilkynning þess efnis er birt á grundvelli 19. gr. MAR-reglugerðarinnar um viðskipti stjórnenda og nákominna aðila.

„Ég er varaformaður stjórnar Íslandsbanka. Eiginkona mín, Ingunn Guðrún Árnadóttir, er með fjármuni í einkabankaþjónustu hjá Arion banka. Henni var nýverið tjáð að einkabankinn, sem tekur sjálfstæðar ákvarðanir um fjárfestingar í sjóðum, hlutabréfum og skuldabréfum, hefði fyrir hennar hönd tekið þátt í hlutafjárútboði Íslandsbanka,“ segir í tilkynningu Stefáns.

„Þetta eru að sjálfsögðu leið mistök sem hefðu ekki átt sér stað ef ég eða konan mín hefðum verðið spurð fyrir fram um fjárfestinguna.“

Samkvæmt tilkynningunni hafði einkabankaþjónustan hjá Arion banka, sem ræðst í sjálfstæðar fjárfestingarákvarðanir, keypt 28.153 hluti í Íslandsbanka fyrir hönd Ingunnar Guðrúnar Árnadóttur þann 20. maí 2025. Heildarverð viðskiptanna nam 2.999.984 krónum.

Ríflega 30 þúsund manns tóku þá þátt í útboðinu í maí en þetta er fyrsta sinn sem tilkynnt er um viðskipti stjórnenda eð nákominna í útboði bankans. Tilkynningar um innherjaviðskipti eiga samkvæmt 19. grein hinnar evrópsku MAR-reglugerðar að vera tilkynnt ekki síður en eftir þrjá viðskiptadaga.

Fjármálaeftirlit Seðlabanka Íslands má samkvæmt lögum leggja á stjórnvaldssektir ef stjórnendur eða nákomnir aðilar þeirra tilkynna ekki viðskipti innan lögboðins frests .