Olíu­fé­lögin hafi átt í sam­ráði án þess að tala saman

Verðlagseftirlit ASÍ birti í gær tilkynningu þar sem fram kom að ólíkt því sem þekkist almennt á heimsvísu, lækki olíuverð hjá íslensku olíufélögunum ekki í takt við heimsmarkaðsverð. 

Frá janúar hafi lægsta eldsneytisverð innanlands lækkað um 2,5 prósent, samanborið við 13,7 prósent lækkun heimsmarkaðsverðs. Var ýjað að því að olíufélögin stunduðu einhverskonar samráð. Olíuverð hjá N1, Orkunni og ÓB sé nánast alltaf það sama.

Magnús Hafliðason, framkvæmdastjóri N1, hafnaði þeim ásökunum í samtali við fréttastofu í kvöldfréttum í gær.  Hann sagði greiningu ASÍ vera vonbrigði. Að það sé lítill verðmunur milli félaga segir ekki til um að það sé verðsamráð, þvert á móti er samkeppnin svo mikil,“ sagði framkvæmdastjórinn.

„Þegjandi samhæfing“

ASÍ segir nú í annarri tilkynningu að N1 hafi átt í „þegjandi samhæfingu“ með öðrum olíufélögum, sem eigi sér stað þegar fáir stórir keppinautar taka gagnkvæmt mið af hegðun hver annars, einkum í verðlagningu, án þess að eiga í beinum samskiptum.

Með því geti markaðsaðilar forðast verðsamkeppni og viðhaldið hærri álagningu.

ASÍ hafi aðeins tekið afstöðu til þess hvort eldsneytismarkaðurinn sýndi einkenni þegjandi samhæfingar. Engin afstaða hafi verið tekin til þess hvort samhæfingu megi rekja til samskipta viðkomandi keppinauta. 

Verðlagseftirliti ASÍ sé ekki kunnugt um slík samskipti og hafi engar vísbendingar þess efnis.

Fagleg ábyrgð Verðlagseftirlitsins sé fyrst og fremst gagnvart almenningi og því miði framsetning ASÍ við verðlag á dælu. Sé útsöluverð leiðrétt fyrir opinberum gjöldum.

Þá bendir ASÍ á að eldsneytiskaupendur á Íslandi hafi ekki notið góðs af verulegrar styrkingar krónunnar það sem af er ári. Með því hafi vísitala neysluverðs lækkað minna en ella með tilheyrandi áhrifum á verðtryggð húsnæðislán landsmanna.