Selur Alvogen í Banda­ríkjunum með sam­runa sem skapar risa á lyfjamarkaði

Þetta kemur fram í tilkynningu frá Aztiq, en auk eignarhaldsfélagsins sem stofnað var af Róberti Wessmann, eru helstu eigendur NAGH eignarhaldsfélögin CVC og Temasek.

Metið á 250 milljarða

„Með kaupum Lotus á Alvogen US verður til eitt af 20 stærstu samheitalyfjafyrirtækjum heims. Áætlaðar tekjur Lotus geta tvöfaldast við sameininguna. Sameinað félag er metið á um 250 milljarða króna,“ segir meðal annars í tilkynningunni, en það nemur rúmlega tveimur milljörðum Bandaríkjadala. 

Við þetta tvöfaldist fjöldi þeirra lyfja sem Lotus er að þróa og verða þannig nærri hundrað. Með kaupunum fái Lotus aðgang að „sérhæfðu söluteymi og rótgróinni lyfjaverksmiðju í Bandaríkjunum, en verksmiðja Alvogen US í Norwich, New York fylki í Bandaríkjunum hefur verið vottuð um áratuga skeið af Matvæla- og lyfjaeftirliti Bandaríkjanna (FDA),“ segir ennfremur í tilkynningunni.

Opnar aðgang að nýjum mörkuðum

Róbert Wessmann segir að hér sé um að ræða spennandi skref fyrir bæði félög sem sé eðlilegt framhald af langvarandi samstarfi félaganna.

„Með kaupunum treystir Lotus stöðu sína á mörkuðum í Asíu og fær aukin tækifæri til að sækja fram í Bandaríkjunum. Lotus er með metnaðarfullar áætlanir um þróun nýrra lyfja, leyfissamninga og yfirtöku félaga. Alvogen fær einnig aðgengi að nýjum mörkuðum, meðal annars í Asíu og Eyjaálfu. Sameinað félag á eftir að geta vaxið hratt og skapað mikil verðmæti fyrir hluthafa um leið og það bætir lífsgæði sjúklinga um allan heim,“ er haft eftir Róberti Wessman, stofnanda og stjórnarformanni Aztiq í tilkynningunni.

Það eru fjárfestingabankinn Jefferies og Rothschild & Co sem voru fjármálaráðgjafar hluthafa NAGH, en lögfræðistofan White & Case veitti lögfræðilega ráðgjöf að því er segir í tilkynningunni.