Hærri kostnaður en á­ætlanir gerðu ráð fyrir

Í tilkynningu frá Icelandair segir að drög að uppgjöri liggi fyrir og gert sé ráð fyrir hagnaði fyrir vexti og skatta (EBIT) upp á 74 milljónir Bandaríkjadala, samanborið við 83,5 milljónir á sama tíma í fyrra.

Tekjur munu hafa aukist á ársfjórðungnum, í samræmi við áætlanir, en kostnaður reyndist hærri. Er það rakið til sterkara raungengis krónunnar og hærri launakostnaðar þess vegna, auk þess sem eldsneytiskostnaður var hærri en gert var fyrir.

Þar að auki hafði ófyrirséð skammtímaleiga á flugvél í ágúst aukinn kostnaði í för með sér.

Gert er ráð fyrir að EBIT afkoma fyrir árið í heild sinni verði neikvæð um tíu til tuttugu milljónir dala.

Í tilkynningunni segir að sjóðsstaða Icelandair hafi verið mjög sterk í lok september og handbært fé hafi verið um 410 milljónir dala. Þá hafi félagið haft aðgang að óádregnum lánalínum upp á 92 milljónir dala.

„Fyrir árið 2026 hefur félagið aðlagað framboð sitt að aðstæðum, einkum að veikri eftirspurn á Norður-Atlantshafsmarkaði og sterkri krónu. Þannig verður flugvélum í farþegaleiðakerfinu fækkað um tvær. Þrátt fyrir fækkun flugvéla er ráðgert að heildarframboð ársins, mælt í sætiskílómetrum, haldist nánast óbreytt á milli ára sem þýðir áframhaldandi bætt nýting innviða allt árið um kring. Áhersla á aukna skilvirkni í rekstri og strangt kostnaðaraðhald er áfram forgangsverkefni en þegar hefur verið ráðist í fjölmargar aðgerðir til þess að bæta rekstur og afkomu,“ segir í áðurnefndri tilkynningu.

Uppgjörið verður birt þann 22. október en ekki þann 23. eins og áður stóð til.