Vísar slúðrinu til föður­húsanna

Hinn 28 ára gamli Paquetá gekk í raðir West Ham frá Lyon árið 2022. Þar áður lék hann fyrir Flamengo í heimalandinu og AC Milan. Þá hefur miðjumaðurinn leikið 59 A-landsleiki frá árinu 2018 og skorað í þeim 12 mörk.

Eftir frábæra byrjun með West Ham hefur hann ítrekað verið orðaður frá félaginu og var Pep Guardiola nálægt því að fá hann til Manchester City. Rannsókn á meintu broti á veðmálareglum ensku úrvalsdeildarinnar ku hafa komið í veg fyrir þau vistaskipti.

Nýverið birti miðillinn The Times frétt þess efnis að Paquetá vildi losna frá West Ham strax í janúar eftir hörmulega byrjun liðsins á leiktíðinni. Brasilíumaðurinn gefur ekki mikið fyrir þær fréttir ef marka má færslu hans á samfélagsmiðlinum X, áður Twitter.

Á myndinni hér að neðan má sjá Paquetá ásamt sonum sínum tveim, og allir eru þeir í búningi West Ham. 

Stuðningsfólk Hamranna getur því andað léttar en það er þó aldrei að vita hvað gerist ef Man City eða álíka stórlið falast eftir kröftum þessa öfluga miðjumanns.