Fram­leiða keflvískan krimma sem gerist á há­punkti kalda stríðsins

Hollywood-miðillinn Hollywood Reporter greinir frá.

Leslie Bibb sem er þekktust fyrir leik sinn í Talladega Nights (2006), Iron Man (2008) og Law Abiding Citizen (2009) mun fylgja eftir góðri frammistöðu sinni í þriðju seríu af sjónvarpsþáttunum White Lotus (2025) með sex þátta glæpaseríunni Top of the Rock.

Serían gerist árið 1983 á hápunkti kalda stríðsins og fylgjast áhorfendur með kapteininum Diane Goodman (Bibb) og herlögreglumanninum Söruh Ellis sem eru báðar staðsettar á Keflavíkurstöðinni. Þegar bandarískur hermaður finnst látinn við undarlegar kringumstæður við stöðina þurfa konurnar tvær að vinna með íslensku lögreglunni að rannsókn málsins. Fljótt kemur blekkingavefur í ljós.

Íslenska framleiðslufyrirtækið Truenorth framleiðir þættina ásamt Mystery Productions og Vertu. Þættirnir eru hugarsmíði Davíðs Óskars Ólafssonar og Jóns Atla Jónassonar og er Ragnar Jónsson meðhöfundur.

Davíð Óskar mun leikstýra þáttunum en hann hefur áður leikstýrt nokkrum þáttum í seríunum The Valhalla Murders (2020) og Trom (2022) og framleitt fjölda kvikmynda og sjónvarpsþættina Fanga (2017). 

Handrit þáttanna er skrifað af Jóni Atla Jónassyni og Óttari M. Norðfjörð. Jón Atli byrjaði í leikhúsinu en færði sig yfir í sjónvarps- og kvikmyndagerð og hefur skrifað Djúpið (2012), Falskan fugl (2013) og Austur (2015) sem hann leikstýrði einnig. Óttar hefur getið sér gott orð sem rithöfundur og skrifaði handritið að glæpaþáttunum Reykjavík 112 (2025), The Darkness (2024) og The Valhalla Murders (2019).