Veiði­gjald á þorski nánast tvö­faldað milli ára

Auglýsing um veiðigjöld næsta árs var birt nú síðdegis. Auglýsingin var nokkuð seinna á ferðinni en venjulega, líkt og Vísir fjallaði um nokkrum mínútum áður en auglýsingin var birt.

Umdeildar breytingar á lögum um veiðigjöld voru samþykktar í sumar. Með þeim voru gerðar breytingar á viðmiðum við útreikning aflaverðmætis sem hefur í för með sér áhrif til hækkunar veiðigjalds.

Ein langreyður skilar 77 þúsund krónum í kassann

Hins vegar þarf að reikna út gjaldið ár hvert miðað við þær forsendur sem lög gera ráð fyrir við ákvörðun gjaldsins og nú hafa niðurstöður þeirra útreikninga verið birtar.

Í auglýsingunni í Stjórnartíðindum segir að veiðigjald á landaðan afla frá og með 1. janúar til 31. desember 2026 nemi í krónum á hvert kílógramm óslægðs afla þeim fjárhæðum sem hér segir:

Veiðigjald á hverja veidda langreyði verði 76.907 krónur og 12.305 krónur á hverja hrefnu. Veiðigjald á sjávargróður verði 769 krónur á hvert landað tonn klóþangs, hrossaþara og stórþara, miðað við blautþyngd.

Miðað við veiðigjöld ársins 2025 hækka veiðigjöld á þorski til að mynda um 90,4 prósent, á ýsu um 13,4 prósent. Mest hækkun er í makríl, upp á 151 prósent, og grásleppa hækkar um 69 prósent.

Veiðigjöld á síld lækka langmest, um 57 prósent. Kolmunni lækkar um 44 prósent og hlýri um 33 prósent.

Engin gjöld á loðnu

Hér að neðan má sjá töflu sem sýnir veiðigjöld ársins og næsta árs og breytingu milli ára. Veiðigjöld á þrjár fiskitegundir detta út og gjöld á aðrar þrjár bætast við. Það skýrist af því að útreikningur veiðigjalda miðar við þarnæsta ár á undan. 

Þannig verða til að mynda engin veiðigjöld innheimt vegna loðnu á næsta ári, að því gefnu að kvóti verði gefinn út, þar sem að engin loðna var veidd í fyrra.