Afsláttardagar skýri skyndi­lega hækkun bensínverðs

Netverji vakti á því athygli á Facebook í gær að bensínverð á stöð Atlantsolíu í Njarðvík hefði snarhækkað um tugi króna yfir daginn.

Guðrún Ragna Garðarsdóttir, forstjóri Atlantsolíu, segir þessa hækkun hafa eðlilega skýringu og hafi ekkert að gera með þær breytingar sem spáð er á olíuverði um næstu áramót, þegar kílómetragjald kemur í stað olíu- og bensíngjalda, heldur sé það vegna afsláttardaga.

Forstjórinn útskýrir að afsláttardagar hafi staðið yfir hjá olíufélaginu í desember en þeim hafi einmitt lokið í gær, en þá höfðu allar stöðvar félagsins verið svokallaðar sprengistöðvar tímabundið.

Á hverjum tíma sé handfylli stöðva „afsláttarlaus“ en þá sé verð lægra en ekki boðið upp á frekari afslátt svo sem með bensínlykli eða öðru slíku. „Við erum til dæmis með tíu svona stöðvar í dag,“ segir Guðrún og tekur fram að sprengjustöðvarnar séu tilgreindar á vefsíðu félagsins.

„Í desember höfðum við allar stöðvar okkar afsláttarlausar og við lækkuðum verð,“ bætir forstjórinn við. 

„Svo var það tekið af. Við gerðum þetta líka um páskana í fyrra en það varð engin umræða þá, en eðlileg er umræðan núna því að skattabreytingar standa fyrir dyrum.“

Óljóst er hve mikið olíuverð lækkar um áramótin. Félag íslenskra bifreiðaeigenda áætlar að bensínverð lækki um rúmar 93 krónur á hvern lítra og dísilverð um rúmar 80 krónur. 

Olíufélögin hafa aftur á móti haldið spilunum þétt að sér en Guðrún segir að olíufélögin megi ekki gefa upp hver lækkunin verði vegna samkeppnislaga.

Hún segir að Atlantsolía muni birta nýtt olíuverð á miðnætti. Framkvæmdastjórar N1 og Olís segja einnig við Morgunblaðið í dag að verðlækkunin muni liggja fyrir um áramótin.