„Einn besti leikur sem maður hefur séð svaka­lega lengi“

Ísland vann Svíþjóð, 35-27, í öðrum leik sínum í milliriðli II í gær. Íslendingar svöruðu þar með fyrir tapið fyrir Króötum, 29-30, á föstudaginn. Ísland er á toppi milliriðils II með fjögur stig, líkt og Svíþjóð, Slóvenía og Króatía.

Jóhann Ingi hefur mikla reynslu af þjálfun, var meðal annars landsliðsþjálfari á árunum 1978-80, og þá hefur hann um langt árabil verið einn fremsti íþróttasálfræðingur landsins. Hann var að vonum ánægður með það sem hann sá til íslenska liðsins í leiknum gegn Svíþjóð í gær.

„Á skalanum einn til tíu var þetta ansi langt á milli níu og tíu. Þótt það sé ekki til neitt sem heitir fullkominn leikur en þetta var alveg frábær frammistaða og satt best að segja, þó það sé erfitt auðvitað að bera leiki saman milli móta og svoleiðis, þá er þetta einn besti leikur sem maður hefur séð svakalega lengi,“ sagði Jóhann Ingi í Reykjavík síðdegis.

„Þá á nánast öllum mælikvörðum, í handboltanum, það er að segja varnarleikurinn, markvarsla, sóknarleikur vel útfærður, liðsheildin nýtt, sem hefur kannski stundum vantað upp á, og svo náttúrulega þessi baráttugleði, þessi baráttuandi sem einkennir íslenska liðið og það er það sem við verðum alltaf að ná fram ef við ætlum að ná langt. Og ég sagði nú fyrir þetta mót, ef ekki núna með þessa frábæru leikmenn og góða þjálfarateymi, hvenær þá?“

Föstudagur og laugardagur upp á hvern einasta dag

Jóhann Ingi var spurður hvort hægt væri að forrita íslenska liðið til að spila eins og það gerði gegn Svíum í öllum leikjum.

„Ég reyni í dag að horfa á þetta pínulítið sem hegðun eða venjur. Venjur ganga út á það að endurtaka sig, því um leið og maður hættir að endurtaka venju eins og að bursta tennur, þá verður það ekki lengur venja,“ sagði Jóhann Ingi.

„Mjög mörg lið nálgast þetta orðið þannig að, til dæmis hjá Magdeburg, þá veit ég að þeir tala dálítið um það að gera það að venju að fara í leik og ná fram ákveðnum stöðugleika, ákveðnum standard, og endurtaka það aftur og aftur. Og það hefur þeim tekist bara mjög vel. Þessi bestu lið eru líka með þessa sömu ákefð á æfingunum. Það er ekkert leyfi fyrir að vera með einhverja mánudaga. Það er bara föstudagur og laugardagur upp á hvern einasta dag.“

Vita af áhlaupinu

Íslendingar voru með sex marka forystu í hálfleik gegn Svíum, 18-12. Heimamenn komu hins vegar sterkir til leiks í seinni hálfleik og minnkuðu muninn í tvígang í eitt mark. En nær komust þeir ekki. Jóhann Ingi segir að Íslendingar hafi sýnt mikinn styrk á meðan áhlaupi Svía stóð.

„Að einhverju leyti má líkja þessu við körfubolta. Það koma svona áhlaup. Það fylgir þessu og leikmenn vita af því. Þið vitið hvað við kölluðum þetta í gamla daga. Þetta er slæmi kaflinn og eitthvað svoleiðis. Þetta eru svona alls konar heiti. En nú er bara gert ráð fyrir þessu og þá er eiginlega alltaf þessi spurning hvernig næ ég að bregðast við? Og það sem mér fannst ráða úrslitum í gær, að bara frá fyrstu mínútu, sá maður hugarfar íslensku leikmannanna á meðan Svíarnir, sem voru búnir að ná fram góðum úrslitum, héldu að þetta kæmi svolítið að sjálfu sér,“ sagði Jóhann Ingi.

Andlegur sigur

„Nú síðan áttuðu þeir sig á því í hálfleik og ætluðu auðvitað að reyna að snúa þessu við og það er tekinn einhver hárblástur eða ég veit ekki hvað. Og vissulega voru þeir komnir til baka en þá var bara innri styrkur liðsins til staðar. Ég myndi segja að þetta hafi verið andlegur sigur, ekki hvað síst. Það er oft þannig að það fer mikil orka í að vinna upp forskot. Svo í lokin þegar þeir sáu að það var ekki hægt er eins og að það sé bara allt loft úr liðinu. Þetta gerist mjög oft í svona keppnisíþróttum, satt best að segja.“

Jóhann Ingi hrósaði liðsheild íslenska liðsins og sagði Snorri hefði dreift álaginu betur en hann hefur gert.

„Snorri og co. eru farnir að nýta liðið og það má alveg segja að það hafi verið alveg réttmæt gagnrýni á að halda sig of mikið við þessa frábæru leikmenn sem eru margir frá Magdeburg. Þar eru þeir auðvitað að spila svona kannski svolítið stóran hluta af leikjunum. Allavega Gísli [Þorgeir Kristjánsson] spilar við alla leikina og Ómar [Ingi Magnússon] spilar nú meira en sá sænski sem var nú í sænska liðinu,“ sagði Jóhann Ingi og vísaði til sænsku skyttunnar, Albins Lagergren. 

Menn verða að fá ákveðið hlutverk

„Mér fannst það svolítið ráða úrslitum í gær að það er verið að nýta mannskapinn og þegar við erum komin á landsliðsmælikvarða eigum við að geta spilað öllum leikmönnum og það er einhvern veginn líka skilaboð inn að við séum liðsheild og við skiptum öll máli,“ sagði Jóhann Ingi. 

„Auðvitað er kannski mismikið hvað menn spila. Það er ekkert einhvern veginn skipt eftir fimmtán mínútur þótt það sé kannski sums staðar. Ef menn ætla að finna til sín og vera hluti af þessu verða menn að fá ákveðið hlutverk. Og það fannst mér bara takast rosalega vel í gær.“

Ísland mætir Sviss í næstsíðasta leik sínum í milliriðli II klukkan 14:30 á morgun.

Hlusta má á allt viðtalið við Jóhann Inga í spilaranum hér fyrir ofan.