Að­eins eitt riðutilfelli allt síðasta ár

Tilkynningin er send út í tilefni af því að rannsóknum lauk á heilasýnum sem tekin voru í sláturhúsum um land allt haustið 2025. Rannsóknirnar fóru fram hjá Tilraunastöð Háskóla Íslands í meinafræði að Keldum og engin sýni greindust jákvæð með tilliti til riðu.

Aðeins eitt riðutilfelli hefur því greinst á árinu 2025, en það var í Skagafirði í september síðastliðnum. Það greindist í kind sem sýndi grunsamleg einkenni heima á bæ.

Niðurskurður fór fram fljótlega eftir greiningu. Ekki liggur fyrir enn hve margar kindur á bænum voru með riðu þar sem rannsóknum á þeim sýnum er ekki lokið.