Lykilfólk úr Vélfagi stofnar nýtt sjávarút­vegstækni­fyrir­tæki

Hjónin Silfá Huld Bjarmadóttir og Elvar Stefánsson voru bæði handtekin þegar embætti héraðssaksóknara gerði húsleit í húsnæði Vélfags á Norðurlandi í janúar. Rannsóknin er í tengslum við meint brot á þvingunaraðgerðum sem meirihlutaeigandi Vélfags sætir vegna ætlaðra tengsla við rússneskan ólígarka.

Þau hafa nú stofnað Mastur, nýtt fyrirtæki sem sem sérhæfir sig í þjónustu, varahlutum og þróun búnaðar fyrir fiskvinnslu í samstarfi við hafnfirska fyrirtækið Micro, að því er kemur fram í tilkynningu sem Silfá Huld sendi fjölmiðlum í dag.

Þar er starfsemi Masturs meðal annars sögð fela í sér þjónustu og viðhald á fiskvinnslubúnaði, sölu varahluta og áframhaldandi þróun lausna fyrir vinnslu. Fyrirtækið hafi þegar hafið starfsemi og lokið afhendingu á fyrstu pöntunum til viðskiptavina.

Elvar er sagður framkvæmdastjóri Masturs. Magnús Rúnar Guðmundsson frá Málmtækni er stjórnarformaður Masturs og Gunnar Óli Sölvason, einn eigenda Micro, á einnig sæti í stjórn nýstofnaða félagsins.

Silfá Huld og Elvar eiga saman helmings hlut í MSTR ehf. sem er með starfsemi á Einhellu í Hafnarfirði. Micro-ryðfrí smíði á helmingshlut á móti þeim. Steinn Árni Ásgeirsson og Sveinn Sigurðsson eiga stærstu hlutina í Micro.

Í samtali við Vísi sagði Silfá Huld að Mastur byggði hvorki á tækjum né hugverki Vélfags. Framleiðsla þess færi fram með tækjabúnaði Micro í Hafnarfirði.

Fékk einnig réttarstöðu sakbornings

Alfreð Tulinius, stjórnarformaður Vélfags, fékk stöðu sakbornings í rannsókn héraðssaksóknara. Spurð að því hvort að hún hafi fengið sambærilega réttarstöðu vísaði Silfá Huld á Friðrik Smárason, lögmann sinn. Hann staðfestir að Silfá Huld hafi fengið réttarstöðu sakbornings í rannsókninni en að hún ætli ekki að tjá sig um hana á meðan hún stendur enn yfir.

Silfá Huld er dóttir Bjarma Sigurgarðarssonar og Ólafar Ýrar Lárusdóttur sem stofnuðu Vélfag fyrir rúmum þrjátíu árum. Þau eru enn minnihlutaeigendur í Vélfagi en starfsemi þess hefur legið niðri frá því í fyrra eftir að Arion banki frysti reikninga þess. 

Ástæðan fyrir frystingunni var sú að Ivan Kaufmann, meirihlutaeigandi Vélfags, er talinn leppur fyrir rússneska útgerðarrisann Norebo sem keypti meirihluta hlutafjár í Vélfagi af stofnendunum á sínum tíma.

Evrópusambandið bætti Norebo á þvingunarlista sinn vegna tilraun rússneskra stjórnvalda til þess að grafa undan stöðugleika í Evrópu í fyrra. Aðeins fjórum dögum fyrr keypti Kaufmann félag sem hélt utan um hluti Norebo í því sem Arion banki og íslensk stjórnvöld telja að hafi verið sýndarviðskipti.

Kaufmann freistar þess nú að fá frystingu fjármuna Vélfags hnekkt fyrir Hæstarétti.