Úlfarnir og Haukarnir með endurkomur

Minnesota lenti mest nítján stigum undir gegn Denver Nuggets en kom til baka og vann fimm stiga útisigur, 114-119. Þetta var fyrsta tap Denver í fjórtán leikjum.

Anthony Edwards skoraði þrjátíu stig fyrir Úlfana og Julius Randle 24. Jamal Murray var með þrjátíu stig hjá Nuggets og Nikola Jokic skilaði 24 stigum, fimmtán fráköstum og átta stoðsendingum. Murray og Jokic hittu hins vegar aðeins úr tveimur af tólf skotum sínum í 4. leikhluta.

Atlanta gerði góða ferð í Stóra eplið og vann nauman sigur á New York Knicks, 106-107.

Haukarnir áttu undir högg að sækja lengi vel en unnu 4. leikhlutann, 28-15. CJ McCollum fór mikinn í liði Atlanta og skoraði 32 stig. Hann klikkaði á tveimur vítaskotum þegar 5,6 sekúndur voru eftir af leiknum og Knicks fékk möguleika til að tryggja sér sigurinn en lokaskot Mikals Bridges geigaði.

Jalen Brunson skoraði 29 stig fyrir Knicks sem var tólf stigum yfir fyrir lokaleikhlutann, 91-79.

Donovan Mitchell og James Harden fóru fyrir liði Cleveland sem sigraði Toronto, 115-105. Cavs er 2-0 yfir í einvíginu.

Mitchell skoraði þrjátíu stig og Harden 28. Evan Mobley bætti svo 25 stigum og átta fráköstum í púkkið. Scottie Barnes var stigahæstur hjá Toronto með 26 stig.