Staðan enn al­var­leg fyrir far­þega en lítil hætta fyrir al­menning

Greint var frá því í morgun að allir farþegar hefðu yfirgefið skipið, MV Hondius, eftir að það kom til Tenerife þann 10. maí. Skipið hefur lagt úr höfn frá Tenerife og er á leið til Hollands með hluta af áhöfn, lækni og hjúkrunarfræðing, þar sem skipið og farangur verða þrifin og sótthreinsuð.

Í uppfærslu landlæknis á Facebook segir að í varúðarskyni séu allir farþegar og áhöfn talin vera útsett fyrir landgöngu og heimflutning. Þau af skipinu sem hafa einkenni þurfa tafarlausa einangrun, prófun og viðeigandi heilbrigðisþjónustu. Þau sem ekki hafa einkenni hafa verið beðin um að vera í sóttkví og fylgjast með einkennum í sex vikur.

Tveir hafa greinst með hantaveiru eftir að hafa yfirgefið skipið og haldið heim. Báðir eru í einangrun. Um er að ræða Frakka og Bandaríkjamann. Í uppfærslu landlæknis segir að annar hafi fengið bráð einkenni í flugi heim og sé nú á gjörgæslu og annað tilfelli hafi greinst á Spáni hjá farþega eftir heimkomu.

Fleiri tilfelli geti komið upp á næstu vikum

Sóttvarnastofnun Evrópu hefur varað við því að vegna langs meðgöngutíma veirunnar geti fleiri tilfelli komið fram á næstu vikum meðal farþega og áhafnar en að áhætta fyrir almenning á ESB/EES-svæðinu sé áfram mjög lítil. Öll staðfest og líkleg tilfelli tengjast skipinu.

Þá kemur fram í uppfærslunni að raðgreining bendi til þess að veiran tengist sama upphaflega smitgjafa og sé svipuð þekktum Andesveirum sem finnast í Suður-Ameríku.

„Þetta er ekki nýtt afbrigði og engar vísbendingar eru nú um að veiran berist auðveldar milli manna eða valdi alvarlegri sjúkdómi en áður þekkist. Staðan er áfram alvarleg fyrir þau sem hafa orðið fyrir beinum áhrifum, en áhætta fyrir almenning á ESB/EES-svæðinu er áfram mjög lítil,“ segir að lokum í stöðuuppfærslunni.