Stjórn­endur keyptu á 83 milljónir og seldu á 195 milljónir

Í tilkynningu Beru til Kauphallar í morgun segir að vegna nýtingar kauprétta þrettán kaupréttarhafa hafi stjórn nýtt heimild sína samkvæmt samþykktum félagsins, til að hækka hlutafé félagsins í þeim tilgangi að mæta nýtingu kaupréttanna. Hlutafé félagsins verði því hækkað um 18.562.500 krónur og muni eftir hækkun standa í 2.884.377.913 að nafnverði, með útgáfu nýrra hluta. Hver hlutur sé að fjárhæð ein króna og hverjum hlut fylgi eitt atkvæði.

Í annarri tilkynningu Beru til Kauphallar er greint frá viðskiptum stjórnenda. Um sé að ræða kaup stjórnenda á grundvelli nýtingar kauprétta annars vegar og hins vegar sölu stjórnenda til Bóksals ehf. Bóksal ehf. er í eigu hjónanna Boga Þórs Siguroddssonar og Lindu Bjarkar Ólafsdóttur og er stærsti eigandi Beru, með rúmlega 11 prósenta hlut.

Samkvæmt tilkynningu keyptu stjórnendur á verðinu 6,48 krónur á hlut og seldu á 15,2 krónur en kaupréttirnir hafi verið veittir árið 2021.

Eftirfarandi stjórnendur hafi keypt 2.250.000 hluti á 14,48 milljónir króna og selt á 34,2 milljónir:

• María Jóna Samúelsdóttir, framkvæmdastjóri Danól
• Guðmundur Pétur Ólafsson, sviðsstjóri sölu- og markaðssviðs Ölgerðarinnar
• Gunnlaugur Einar Briem, sviðstjóri reksturs og vörustýringar Beru
• Jón Þorsteinn Oddleifsson, forstjóri Beru
• Óli Rúnar Jónsson, framkvæmdastjóri Ölgerðarinnar

Þá hafi eftirfarandi stjórnendur keypt 787.500 hluti á 5,1 milljón króna og selt á 12 milljónir króna:

•  Júlía Eyfjörð Jónsdóttir, sviðsstjóri framleiðslu- og tæknisviðs Ölgerðarinnar
• Óskar Ingi Magnússon, fjármálastjóri Beru