Kristinn V. Jóhannsson er látinn

Atli Ísleifsson skrifar 8. júlí 2026 11:11

Kristinn V. Jóhannsson í níræðisafmæli sínu á síðasta ári. Jóhann G. Kristinsson

Kristinn V. Jóhannsson, fyrrverandi stjórnarformaður Síldarvinnslunnar til nítján ára, er látinn, 91 árs að aldri. Hann lést 3. júlí síðastliðinn á heimili sínu í Reykjavík.

Greint er frá andláti Kristins á vef Síldarvinnslunnar. Hann átti sæti í stjórn Síldarvinnslunnar á árunum 1983 til 2005 og var formaður stjórnarinnar á árunum 1984 til 2003. Þá átti hann sæti í bæjarstjórn Neskaupstaðar á árunum 1966 til 1990.

Fram kemur að hann hafi sinnt stjórnarstörfum í Síldarvinnslunni af einstakri samviskusemi og dugnaði og átt farsælt og gott samstarf við aðra stjórnarmenn og stjórnendur fyrirtækisins.

„Kristinn fæddist í Neskaupstað þann 28. ágúst árið 1934 og ólst þar upp. Hann hélt til náms í menntaskóla og háskóla en á námsárunum lagði hann stund á ýmis sumarstörf og þá helst sjómennsku. Þegar náminu lauk fluttist hann fljótlega á sínar gömlu heimaslóðir ásamt Báru Jóhannsdóttur eiginkonu sinni. Eftir að heim var komið sinnti hann kennslustörfum við Gagnfræðaskólann í Neskaupstað en árið 1971 var hann ráðinn skólastjóri Iðnskóla Austurlands og því starfi gegndi hann í áratug. Árið 1981 tók Kristinn við starfi framkvæmdastjóra Samvinnufélags útgerðarmanna í Neskaupstað og var félagið starfsvettvangur hans allt til ársins 2005.

Stjórn og framkvæmdastjóri Síldarvinnslunnar árið 1998. Aftari röð frá vinstri: Þórður Þórðarson, Finnbogi Jónsson framkvæmdastjóri og Halldór Þorsteinsson. Fremri röð frá vinstri: Kristinn Ívarsson, Kristinn V. Jóhannsson og Guðmundur Bjarnason.Síldarvinnslan

Auk áðurnefndra starfa sinnti Kristinn félagsmálum í Neskaupstað og má meðal annars nefna að hann var formaður Íþróttafélagsins Þróttar á árunum 1964 – 1966. Ferill hans á sviði bæjarmála er eftirtektarverður. Kristinn átti sæti í bæjarstjórn Neskaupstaðar á árunum 1966 – 1990. Hann var varaforseti bæjarstjórnarinnar á árunum 1966 – 1974 og síðan forseti á árunum 1974 – 1990. Naut Kristinn mikils trausts sem sveitarstjórnarmaður og voru honum falin margvísleg verkefni á vettvangi sveitarsjórnarmála.

Bára, eiginkona Kristins, lést árið 2006 en nokkrum árum síðar hóf hann sambúð með Katrínu Oddsteinsdóttur frá Stykkishólmi. Þau Kristinn og Katrín dvöldu ýmist í Neskaupstað eða Stykkishólmi. Katrín lést árið 2024 og eftir það bjó Kristinn í Reykjavík,“ segir í tilkynningunni.

Útför fer fram frá Bústaðakirkju í Reykjavík fimmtudaginn 16. júlí klukkan15. Kveðjuathöfn og greftrun fer fram mánudaginn 27. júlí frá Norðfjarðarkirkju klukkan 13.

Síldarvinnslan Andlát Fjarðabyggð Sjávarútvegur

Mest lesið

Fleiri fréttir