Loka á um­deilda veðmálasíðu í Dan­mörku

Danska ríkisútvarpið segir að dómstóll í Frederiksberg hafi skipað fyrir um að aðgangi að Polymarket og fleiri veðmálasíðum yrði lokað að kröfu eftirlitsstofnunar með happdrættum. Stofnunin telur síðurnar brjóta dönsk lög um happdrætti, að því er segir í frétt danska ríkisútvarpsins.

Síðurnar hafa verið horn í síðu danskra stjórnvalda. Ane Halsboe-Jørgensen, þáverandi skattamálaráðherra, sagði slíka starfsemi ekki eiga heima í Danmörku og vildi kanna hvort fýsilegt væri að loka á hana fyrr á þessu ári.

Eftirmaður hennar, Jakob Engel-Schmidt, segist ánægður með að aðgangi að Polymarket hafi verið lokað.

„Ef þú vilt taka þátt í dönskum markaði verður þú að fara að dönskum lögum. Þú getur ekki beint viðskiptum þínum að dönskum neytendum og grætt pening á þeim ef þú telur dönsk lög ekki eiga við um þig,“ sagði ráðherrann.

Ósiðleg starfsemi

Polymarket er umdeilt víðar en í Danmörku. Ólíkt hefðbundnum veðmálasíðum þar sem veðmangarar bjóða upp á veðmál með líkum sem þeir ákvarða veðja notendur Polymarket gegn hver öðrum.

Hægt er að veðja á nánast allt undir sólinni á vefsíðunni, þar á meðal hvenær fólk deyr, stríð og aðrar hörmungar. Bandarískur hermaður var handtekinn fyrr á þessu ári en hann notaði innherjaupplýsingar um hernaðaraðgerðir Bandaríkjastjórnar í Venesúela til þess að veðja á síðunni.

Engel-Schmidt, skattamálaráðherra, telur viðskiptalíkan Polymarket ósiðlegt.

„Við erum að tala um fólk sem glatar lífi sínu, um fjölskyldur sem missa ástvini, um stríð sem rústa heilu samfélögunum. Svo sest einhver niður og segir: hvernig væri að við gætum veðjum á hvenær það gerist? Það er alveg klikkað. Mannslíf er ekki happdrættismiði,“ segir ráðherrann.

Polymarket er aðgengilegt á Íslandi þó að starfsemin sé ekki lögleg hér á landi. Íslensk stjórnvöld hafa ekkert aðhafst gegn erlendum veðmálasíðum sem hafa þótt styrkt alls kyns áhrifavalda, íþróttamenn og fjölmiðlamenn undanfarin ár.