Í lagi með rafmagn og drykkjarvatn í Eyjum

Vestmannaeyingar hafa verið uggandi um rafmagn og vatn eftir að gos hófst í Eyjafjallajökli og hlaup hófst í Markarfljóti. Drykkjarvatn eyjarskeggja kemur með leiðslu úr Stóru-Mörk og liggur leiðslan undir Markafljót og er grafin á fimm metra dýpi undir árbotninum.

Gísli Óskarsson fréttaritari ræddi við Ívar Atlason hjá Hitaveitu Suðurnesja og spurði hann út í þessi mál. Hann segir vatnið í lagi eins og stendur en að það sé hinsvegar í hættu ef vesturvarnargarðurinn við Markarfljót rofnar. Menn hafa ekki miklar áhyggjur af leiðslunni þar sem hún liggur undir fljótið en hún liggur hinsvegar mun nær yfirborðinu við garðinn. Því sé það áhyggjuefni ef garðurinn rofnar.

Rafmagn til Eyja hefur hins vegar verið í fínu lagi í dag.

Að sögn Ívars er ph gildi vatnsins 9 sem þýðir að það er basískt en ekki súrt sem bendir til þess að gosefni séu ekki í vatninu. Það mælist ennfremur mjög hreint og því greinilegt að hlaupið hefur ekki haft áhrif á gæði drykkjarvatnsins.