Dimm él á Suður- og Vesturlandi

Dimm él er á Suður-og Vesturlandi og einnig snjóar á norðausturhorni landsins nú í morgunsárið. Lögreglan beinir því til vegfarenda að fara sérstaklega varlega í umferðinni.

Vindur er hægur og verður það áfram fram á daginn. Samkvæmt spá Veðurstofunnar mun þó ganga í norðan 10-18 m/s í kvöld og í nótt. Létta mun til sunnanlands en snjóa um landið norðanvert.

Í hugleiðingum veðurfræðings segir þó að von sé á vorlegu veðri seinni helming vikunnar.



Á miðvikudag:

Gengur í sunnan 10-18 með rigningu eða slyddu, en hægari og þurrt norðaustan- og austanlands. Hlýnar í veðri, hiti 1 til 6 stig síðdegis, mildast með suðurströndinni, en vægt frost A-til.

Á fimmtudag:

Sunnan 3-10 og dálítil rigning eða slydda af og til, en bjartviðri á Norður- og Austurlandi. Hiti 0 til 5 stig.

Á föstudag:

Hæg austlæg eða breytileg átt og léttskýjað, en skýjað um landið austanvert. Hiti breytist lítið.

Á laugardag og sunnudag:

Fremur hæg suðaustan- og austanátt. Skýjað og úrkomulítið sunnantil á landinu, annars víða bjart veður. Hiti 2 til 7 stig að deginum.